အမေရိကန်ပြည်ထောင်စုဟာ လုံခြုံရေးအကူအညီ ပက်ကေ့ချ်ရဲ့ တစိတ်တပိုင်းအဖြစ် ကျယ်ကျယ် ပြန့်ပြန့် တားမြစ်ထားတဲ့ ပဒေသာဗုံးတွဲ အမြောက်အများ ယူကရိန်းဆီ ပေးပို့မှာဖြစ်ကြောင်း ဇူလိုင် ၇ ရက်မှာ ကြေညာခဲ့ပါတယ်။ 

ဒီဆောင်ရွက်ချက်ဟာ ဝင်သိမ်းပိုက်ထားတဲ့ ရုရှားတပ်တွေအပေါ် ထူးထူးခြားခြား စိတ်ပိုင်းခံစားမှုပိုင်း သက်ရောက်မှုရှိလိမ့်မယ်လို့ ယူကရိန်းက ပြောပါတယ်။ 

ယူကရိန်းနိုင်ငံဟာ ရုရှားတပ်တွေ တပ်စွဲထားတဲ့ နေရာတွေကို ဗုံးကြဲတိုက်ခိုက်ဖို့ ပဒေသာဗုံးတွဲ လက်နက်တွေကို တောင်းဆိုထားတာပါ။ 

ယူကရိန်းကို ပဒေသာဗုံးတွဲတွေ ပေးအပ်မယ့် အစီအစဉ်ကို ပင်တဂွန်စစ်ဌာနချုပ်က မကြေညာ သေးခင်မှာ သမ္မတ ဂျိုးဘိုင်ဒန်ရဲ့ အမျိုးသားလုံခြုံရေးအကြံပေး ဂျိတ်ခ်ဆူလီဗန်က သောကြာနေ့မှာ ထုတ်ဖော် ပြောကြားခဲ့တာ ဖြစ်ပါတယ်။ 

ပင်တဂွန်စစ်ဌာနချုပ်ကတော့ အမေရိကန်အစိုးရရဲ့ ဆုံးဖြတ်ချက်ကို အကြောင်းပြချက် ၃ ခုနဲ့ ကာကွယ် ပြောဆိုခဲ့ပါတယ်။ 

“ရုရှားဟာ ယူကရိန်းကို တိုက်ခိုက်ဖို့အတွက် ဒီစစ်ပွဲစတင်ကတည်းက ပဒေသာဗုံးတွဲ လက်နက်ခဲယမ်းတွေကို သိမ်းကျုံးအသုံးပြုခဲ့ကြောင်း၊  ဒုတိယအချက်အနေနဲ့ ရုရှားရဲ့ပဒေသာ ဗုံးတွဲ တွေနဲ့ နှိုင်းယှဉ်ရင် အမေရိကန်က ယူကရိန်းကို ပေးပို့မယ့် အဆင့်မြှင့်-သမားရိုးကျ လက်နက် ခဲယမ်း တွေမှာ စွမ်းရည်နိမ့်ကျမှုနဲ့ မသေချာမှုတွေ အလွန်အမင်း နည်းပါးကြောင်း” ကာကွယ်ရေး ဝန်ကြီးဌာန အတွင်းဝန် ကိုလင်းန် ကာဟ်လ်က ပြောပါတယ်။ 

တတိယအချက်ကတော့ ဆုံးဖြတ်ချက်နဲ့ ဆက်စပ်နေတဲ့ အန္တရာယ်တွေကို လျှော့ချဖို့ ယူကရိန်းနဲ့ လက်တွဲဆောင်ရွက်နေကြောင်း ပြောပါတယ်။ 

ယူကရိန်းအစိုးရဟာ ICBM ဒုံးကျည်တွေကို တာဝန်သိသိ အသုံးပြုခြင်းနဲ့ ပတ်သက်လို့ အာမခံချက်ပေးထားပြီး အရပ်သားတွေ နေထိုင်တဲ့ မြို့ပြပတ်ဝန်းကျင်မှာ အသုံးပြုမှာ မဟုတ်ကြောင်း အပါအဝင် သူတို့ အသုံးပြုတဲ့နေရာတွေကို မှတ်တမ်းတင်ထားမှာဖြစ်ပြီးတော့ နောက်ပိုင်းမှာ မိုင်းရှင်းလင်းရေး ကြိုးပမ်းမှုတွေကို လွယ်ကူစေမှာဖြစ်ကြောင်းလည်း ကာကွယ်ရေးအတွင်းဝန်က ပြောပါတယ်။ 

လူ့အခွင့်အရေးအဖွဲ့ တွေကတော့ ဝါရှင်တန်ရဲ့ ဆုံးဖြတ်ချက်ကို ဆန့်ကျင်ထားကြပြီး ပဒေသာဗုံးတွဲတွေကို နိုင်ငံပေါင်း ၁၀၀ ကျော်မှာ တားမြစ်ထားပါတယ်။ 

များသောအားဖြင့် ပဒေသာဗုံးတွဲတွေဟာ ကျယ်ပြန့်တဲ့ ဧရိယာမှာ သိမ်းကျုံးချေမှုန်းပစ်နိုင်တဲ့ အသေးစား ဗုံးသီးအမြောက်အမြားကို ထုတ်လွှတ်လေ့ရှိပြီး တိုက်ပွဲတွေပြီးဆုံးပြီးနောက် မပေါက်ကွဲဘဲ ကျန်နေတဲ့ ဗုံးသီးတွေဟာ ဆယ်စုနှစ်ချီ အန္တရာယ်ကြီးပါတယ်။ 

Source-Reuters