အိန္ဒိယနိုင်ငံ၊ ဂင်္ဂါလွင်ပြင်မှာ မုတ်သုံမုန်တိုင်းငယ် (Monsoon Depression) တခု ဇွန် ၂၆ ရက် ဒီကနေ့ ဖြစ်ပေါ်လာနိုင်ပြီး အိန္ဒိယ၊ ဘင်္ဂလားဒေ့ရှ်နဲ့ မြန်မာနိုင်ငံဒေသတွေကို မိုးပိုမိုလာစေနိုင်တယ်လို့ အမျိုးသားညီညွတ်ရေးအစိုးရ (NUG) လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ခန့်မှန်းထုတ်ပြန်ပါတယ်။
ဇွန် ၂၆ ရက်ကနေ လာမယ့် ဇူလိုင် ၂ ရက်အထိ ရက်သတ္တပတ်အတွင်း မိုးလေဝသအခြေအနေ ကြိုတင်ခန့်မှန်းချက်တွေကို ထုတ်ပြန်ထားတာဖြစ်ပြီး လာမယ့် ရက်သတ္တပတ်အတွင်း မြန်မာ့ကမ်းရိုးတန်းဒေသတွေမှာ မုတ်သုံလေ ဆက်လက်အားကောင်းပြီး မိုးပိုမို ရွာသွန်းလာနိုင်တယ်လို့လည်း ဆိုပါတယ်။
မြန်မာနိုင်ငံတောင်ပိုင်းကို မုတ်သုံလေဝင်ရောက်ချိန် မေ ၂၉ ရက်ကနေ ဇွန်လကုန်အထိကို “မိုးဦးကာလ” လို့ သတ်မှတ်ထားပြီး ဇူလိုင် ၁ ရက်ကနေ သြဂုတ် ၃၁ ရက်အထိကို “မိုးလယ်ကာလ” လို့ သတ်မှတ်ထားတာပါ။
လတ်တလောမှာတော့ မိုးဦးကာလကုန်ဆုံးဖို့ ရက်သတ္တပတ် ၁ ပတ်လောက်ပဲ ကျန်ရှိနေပြီး အခုတပတ်အတွင်းမှာလည်း ဘင်္ဂလားပင်လယ်အော်မှာ မုတ်သုံလေ ဆက်လက်အားကောင်းလာနိုင်တာကြောင့် ကမ်းရိုးတန်းဒေသတွေနဲ့ မြောက်ပိုင်းဒေသတွေမှာ မိုးကြီးလာနိုင်ပြီး မြို့ပြနဲ့ မြစ်ချောင်းတွေ ရေကြီးရေလျှံနိုင်ခြေရှိတယ်လို့လည်း အသိပေးထားပါတယ်။
