ထားဝယ်ခရိုင် ဒီမိုကရေစီအရေးလှုပ်ရှားမှုသပိတ်ကော်မတီ DDMSC ရဲ့ ကော်မတီဝင်တစ်ဦး ဖြစ်တဲ့ မညိုမာဦးဟာ တနင်္သာရီတိုင်း၊ ထားဝယ်အကျဉ်းထောင်ကနေ ဇွန်လ ၂၂ ရက် နေ့လယ်ပိုင်းမှာ လွတ်ရက်စေ့ပြီး ပြန်လည်လွတ်မြောက်လာခဲ့တယ်လို့ ထားဝယ်နိုင်ငံရေးအကျဉ်းသားများကွန်ရက်က သတင်းထုတ်ပြန်ထားပါတယ်။
ထားဝယ်သပိတ်ကော်မတီဝင်တစ်ဦးက “မညိုမာက ထောင်ဒဏ်ချခဲ့ရတာက ၃ နှစ်နဲ့ ၆ လ။ အခုလွတ်တဲ့အချိန်ထိ ထောင်ထဲမှာ ၂ နှစ်နဲ့ ၁ လ နေလိုက်ရတယ်။ ၅၀၅(က) အမှုအတွက်က လွတ်ငြိမ်းချမ်းသာခွင့်ပေးတုန်းက လျှော့ပေါ့ပေးထားတော့ လွတ်ရက်စေ့ပြီး ပြန်လွတ်လာတယ်လို့ ဆိုလို့ရတယ်” လို့ ဒီဗွီဘီကို ပြောပါတယ်။
မညိုမာဦးဟာ ၂၀၂၁ ခုနှစ် မေလ ၂၉ ရက်က ထားဝယ်မြို့က နေအိမ်တလုံးမှာ တခြားသူ ၃ ဦးနဲ့အတူ စစ်ကောင်စီရဲ့ ဖမ်းဆီးခြင်းခံရပြီး ပုဒ်မ ၅၀၅(က)၊ ၅၀၅(ဂ) နဲ့ ၁၉ (စ) ပုဒ်မတွေနဲ့ ထားဝယ်အကျဉ်းထောင်မှာ ထောင်ဒဏ် ၃နှစ်ခွဲ ချမှတ်ခံခဲ့ရပါတယ်။
မညိုမာနဲ့ အတူ အဖမ်းခံခဲ့ရသူ သုံးဦးစလုံးလည်း အခုနှစ်ဆန်းပိုင်းကတည်းက ပြန်လည်လွတ်မြောက်သွားပြီလို့ သိရပါတယ်။
အကြမ်းမဖက်လူထုလှုပ်ရှားမှုနဲ့ စစ်အာဏာသိမ်းမှုကို အစဉ်တစိုက် ဆန့်ကျင်တော်လှန်နေတဲ့ ထားဝယ်သပိတ်ကော်မတီဝင် ၅ ဦးဟာ စစ်ကောင်စီတပ်ရဲ့ဖမ်းဆီး ထောင်ချခြင်းကိုခံခဲ့ရပြီးနောက် ၃ဦးပြန်လွတ်မြောက်လာပြီဖြစ်လို့ ကော်မတီဝင် ၂ ဦး ဆက်ရှိနေဆဲဖြစ်ပါတယ်။
ဇွန်လ ၁၉ ရက်ကလည်း ထားဝယ်သပိတ်ကော်မတီဝင်တဦးဖြစ်သူ ကိုမင်းလွင်ဦးရဲ့ ဖခင်ကို စစ်ကောင်စီကဖမ်းဆီးထားပြီး ဒီနေ့အထိမိသားစုနဲ့တွေ့ခွင့်မရသေးကြောင်း ကော်မတီထံက သိရပါတယ်။
ထားဝယ်အကျဉ်းထောင်မှာ အခုနှစ် ဇန်နဝါရီ အထိ စာရင်းအရ အမိန့်ချပြီးနဲ့ တရားရင်ဆိုင်ဆဲ နိုင်ငံရေးအကျဉ်သား ၃၀၀ ကျော်ရှိနေတယ်လို့ ထားဝယ်နိုင်ငံရေးအကျဉ်းသားများကွန်ရက်ရဲ့ မှတ်တမ်းအရသိရပါတယ်။
