စစ်အုပ်ချုပ်ရေးကြေညာထားတဲ့ တနင်္သာရီမြို့နယ်ထဲမှာ သိန္ဓောစခန်းဘက်ကို ပြန်လာတဲ့ စစ်ကောင်စီ စစ်ကြောင်းကို ပြည်သူ့ကာကွယ်ရေးပူးပေါင်းတပ်ဖွဲ့တွေက ကြားဖြတ်တိုက်ခိုက် ခဲ့ပြီးနောက် နှစ်ဖက်တိုက်ပွဲပြင်းထန်ခဲ့တယ်လို့ ပြည်သူ့ကာကွယ်ရေးတပ်ဖွဲ့ဝင်တွေက ပြောပါတယ်။
ဘန်လောကျေးရွာနဲ့ သမီးလှကျေးရွာတို့မှာ ဇွန် ၁၇ ရက် မနက် ၁၀ နာရီလောက် စစ်ကောင်စီ စစ်ကြောင်း ကြားဖြတ်တိုက်ခိုက်ခံရတာဖြစ်ပြီး နှစ်ဖက်တိုက်ပွဲပြင်းထန်ခဲ့ကာ ညနေ ၅ နာရီ လောက်မှာ တိုက်ပွဲငြိမ်သက်သွားခဲ့တယ်လို့ ဆိုပါတယ်။
တိုက်ပွဲအတွင်း စစ်ကောင်စီတပ်က လက်နက်ကြီးတွေနဲ့ အဆက်မပြတ် ပစ်ခတ်တိုက်ခိုက်ခဲ့တာကြောင့် နေအိမ်တွေ ထိမှန်ပျက်စီးခဲ့ကာ အရပ်သား ၂ ဦး ဒဏ်ရာရခဲ့တယ် လို့ ပြည်သူ့ကာကွယ်ရေးတပ်ဖွဲ့ဝင်တဦးက ပြောပါတယ်။
"သူတို့က လက်နက်ကြီးတွေ နဲ့ အဆက်မပြတ် ပစ်တယ်။ အရပ်သား ၂ ဦးဒဏ်ရာရထားတယ်။ နေအိမ်တွေ လက်နက်ကြီး ထိမှန်ပြီး အရေအတွက်ကတော့ အတည်မပြုရသေးဘူး။ လက်ရှိ ရွာသားတွေတော့ စစ်ရှောင်နေကြရတယ်။"
နှစ်ဖက်ပစ်ခတ်မှုမှာ ပြည်သူ့ကာကွယ်ရေးဘက်က ထိခိုက်မှုမရှိခဲ့ဘဲ စစ်တပ်က အထိအခိုက် ကျဆုံးများပြီး အတိအကျတော့ အတည်မပြုနိုင်သေးဘူးလို့ ဆိုပါတယ်။
အဆိုပါတိုက်ပွဲကို ပြည်သူ့ကာကွယ်ရေးတပ် ပ.က.ဖ နဲ့ မြိတ်ခရိုင်တပ်ရင်း ၂ တို့က ပူးပေါင်းတိုက်ခိုက်ခဲ့တယ်လို့ သိရပါတယ်။
တိုက်ပွဲကြောင့် ညောင်ပင်ကွင်းကျေးရွာ၊ ခြောက်မိုင်ရွာ၊ ဆင်ခေါင်းရွာ၊ ဘန်လောရွာ၊ ဘန်လင်ရွာ၊ သမီးလှရွာ၊ ကော်တောရွာ၊ ရေပေါ်ရွာ၊ ဘန်ကြုတ်ရွာ၊ သကျက်ရွာနဲ့ ကျွဲထိန်းကုန်းရွာတို့က ဒေသခံပြည်သူ့အများအပြား ဘေးလွတ်ရာနေရာကို ထွက်ပြေးတိမ်းရှောင်နေကြရတယ်လို့ သိရပါတယ်။
