စစ်အာဏာရှင်တပ်တွေကို ရင်ဆိုင်တိုက်ခိုက်နေတဲ့ တော်လှန်ရေးအဖွဲ့တွေအတွက် ရန်ပုံငွေရှာတဲ့အနေနဲ့ “မြွေပွေးတစ်ထောင်ကမ်ပိန်း” လှုပ်ရှားမှုနဲ့ “တော်လှန်နှုတ်ခမ်းနီ” လှုပ်ရှားမှုကို OFP Fundraising Program ကနေ လုပ်ဆောင်နေပါတယ်။
မြွေပွေးတစ်ထောင်ကမ်ပိန်းကို ဇွန်လ ၁၀ ရက်နေ့ကစတင်ပြီး ဇူလိုင် ၁၀ ရက်နေ့အထိ ပြုလုပ်သွားမှာဖြစ်ပြီး စစ်ကိုင်းတိုင်း ရွှေဘိုခရိုင်အမှတ် ၁၇ တပ်ရင်းအတွက် လှူဒါန်းသွားမှာဖြစ်တယ်လို့ သိရပါတယ်။
Burma Spring Revolution-Utica နဲ့ တော်လှန်ကောမစ် V 2.0 တို့ကနေတစ်ဆင့် မြေပြင်မှာ လက်တွေ့လှုပ်ရှားနေတဲ့အဖွဲ့ဆီ တိုက်ရိုက်လှူဒါန်းသွားမှာဖြစ်ပါတယ်။
အခုပြုလုပ်နေတဲ့ ကမ်ပိန်းကို ပြည်တွင်းကသာမက နိုင်ငံအနှံ့အပြားက မြန်မာပြည်သူတွေ ပါဝင်နိုင်ဖို့အတွက် လုပ်ဆောင်ထားတာဖြစ်ပြီး မြေပြင်မှာ လက်တွေ့ တိုက်ပွဲဝင်နေရသူတွေဆီကို တိုက်ရိုက်လှူဒါန်းမှာဖြစ်တဲ့အတွက် ယုံကြည်စိတ်ချစွာ ပါဝင်ပေးဖို့အတွက် လှုပ်ရှားမှုမှာပါဝင်တဲ့ တာဝန်ရှိသူတစ်ဦးက ပြောပါတယ်။
တော်လှန်နှုတ်ခမ်းနီ ကမ်ပိန်းကိုတော့ ဒီနေ့ ဇွန်လ ၁၆ ရက်နေ့ကနေစတင်ကာ ဇူလိုင် ၇ ရက်နေ့ထိ ၃ ပတ်တာ ပြုလုပ်သွားမှာဖြစ်ပြီး တော်လှန်ပြည်သူတွေမှ ပါဝင်လှူဒါန်းထားတဲ့ လက်ဝတ်ရတနာများကို ရောင်းချသွားမှာဖြစ်ပါတယ်။
“တော်လှန်နှုတ်ခမ်းနီ” လှုပ်ရှားမှုမှ ရရှိလာတဲ့ အလှူငွေများကို ဂန့်ဂေါခရိုင်၊ ယင်းမာပင်ခရိုင်နဲ့ မုံရွာခရိုင် စတဲ့ တပ်ရင်း၃ ရင်းကို ကူညီထောက်ပံ့သွားမှာဖြစ်တယ်လို့လည်း သိရပါတယ်။
