မကွေးတိုင်း၊ ဂန့်ဂေါမြို့နယ်မှာ စစ်ဘေးရှောင်ကျောင်းသားတွေအတွက် သင်ထောက်ကူပစ္စည်း ဝယ်ယူနိုင်ဖို့နဲ့ ကာကွယ်ရေးတပ်ဖွဲ့တွေအတွက် လက်နက်ခဲယမ်းတွေ ဝယ်ယူနိုင်အောင် ကံစမ်းမဲကမ်ပိန်း ပြုလုပ်နေတယ်လို့ ဂန့်ဂေါခရိုင် တပ်ရင်း (၁၉) PDF-ကျော က ပြောပါတယ်။
“ကျနော်တို့စိုးမိုးနယ်မြေထဲမှာ စစ်ဘေးရှောင်ပြည်သူ ၃၀၀ ကျော်လောက်ရှိပြီး စစ်ဘေးရှောင် ကျောင်းသား၊ ကျောင်းသူ ဦးရေက အယောက် ၄၀ လောက်ရှိတယ်၊ မူလတန်းကနေ အထက်တန်းအဆင့်အထိ CDM ဆရာ/ဆရာမတွေက ပညာသင်ကြားပေးနေတယ်” လို့ PDF-ကျောရဲ့ တာဝန်ခံ နွေဦးမေတ္တာက ပြောပါတယ်။
စစ်ဘေးရှောင်ကျောင်းသားတွေအတွက် သင်ထောက်ကူပစ္စည်းတွေ အရေးပေါ်လိုအပ်နေသလို ညဘက် စာကြည့်ဖို့အတွက် မီးလုံး၊ ဆိုလာ၊ ဘက်ထရီတို့ လိုအပ်နေတယ်လို့ ဆိုပါတယ်။
“ကျနော်တို့ PDF-ကျောနဲ့ LPDF အဖွဲ့တခုဖြစ်တဲ့ FRF-ဂန့်ဂေါ တပ်ဖွဲ့နဲ့ ပူးပေါင်းပြီး “နှစ်ဖွဲ့ နှစ်လက်” ဆိုတဲ့ ကံစမ်းမဲ ကမ်ပိန်းတခုပြုလုပ်ပြီး အဲဒီကရတဲ့ ငွေကြေးတွေကို FRF ကတော့ လက်နက်ဖြည့်တင်းရေးအတွက် လုပ်ဆောင်မှာဖြစ်ပြီး ကျနော်တို့ ကျောတပ်ဖွဲ့ကတော့ ထုတ်လုပ်ရေး၊ စစ်ဘေးရှောင်နဲ့ တပ်တွင်းရိက္ခာပိုင်းတွေမှာ သုံးစွဲသွားမယ်” လို့ နွေဦးမေတ္တာက ပြောပါတယ်။
ကံစမ်းမဲ ၁ စောင်ကို ၁၀၀၀ ကျပ်နဲ့ ဇွန်နဲ့ ဇူလိုင် ၂ လရောင်းချမှာဖြစ်ပြီး ပထမဆုအနေနဲ့ ရွှေလက်စွပ်တကွင်း၊ ဒုတိယဆု REDMI Note 12 လက်ကိုင်ဖုန်းတလုံးနဲ့ တတိယဆုကတော့ ချင်းရိုးရာဝတ်စုံတွေကို မဲဖောက်ပေးသွားမယ်လို့ ဆိုပါတယ်။
လက်ရှိအခြေနေမှာ ကံစမ်းမဲ ကမ်ပိန်းဟာ ၃၀ ရာခိုင်နှုန်းလောက်သာ အောင်မြင်သေးတာကြောင့် ပြည်တွင်းပြည်ပမှာရှိကြတဲ့ မိဘပြည်သူတွေအနေနဲ့ “နှစ်ဖွဲ့ နှစ်လက်”ကံစမ်းမဲ ကမ်ပိန်းမှာ ပါဝင်အားဖြည့်ပေးကြဖို့ မေတ္တာရပ်ခံတောင်းဆိုထားပါတယ်။
