မန္တလေးမြို  အလယ်ပိုင်းတိုင်းစစ်ဌာနချုပ်နားက မန္တလေးတောင်ခြေက ခလရ-၉၁၀ ရဲ့ အင်ဂျင်နီယာ (GE) တပ်ကို  မေ ၂၇ ရက် မနက် ၈ နာရီလောက်မှာ ဒေသကာကွယ်ရေးတပ်က ပစ်ခတ်တိုက်ခိုက်ခဲ့တယ်လို့ ဒေသခံတွေက ပြောပါတယ်။

နတ်ဆိုး (မြေအောက်တော်လှန်ရေးတပ်ဖွဲ့) နဲ့အတူ  ပြင်ဦးလွင်ခရိုင် PDF အမှတ် ၁ တပ်ရင်း တပ်ခွဲ ၁ တို့က ၄၀ မမ ၂ လုံးနဲ့ လက်နက်တိုက်ရှိနိုင်တဲ့နေရာကို ပစ်ခတ်ခဲ့တာလို့ နတ်ဆိုး​ ​မြေ​အောက်​တော်လှန်​ရေး​ တာဝန်ခံ ဗိုလ်နတ်ဆိုးက ပြောပါတယ်။

"ပြည်သူတွေကို သတ်ဖြတ်နေတာတွေ၊ ဖိနှိပ်နေတာတွေ၊ မထီမဲ့မြင်ပြုနေတာတွေကို လျှော့ချနိုင်အောင်နဲ့ နယ်မြေအရပ်ရပ်က စစ်မျက်နှာပြင်တွေပေါ် အင်အားအလုံးရင်းနဲ့ ထိုးစစ်ဆင် တာတွေ အနည်းငယ်လျော့ကျစေဖို့ ရည်ရွယ်ချက်နဲ့ တိုက်ခိုက်ခဲ့တာပါ။" 

တပ်အနီး မန္တ​လေး​တောင်​ခြေမှာ ​စျေး​ရောင်းသူတဦးက​ "GE တပ်က မန္တ​လေးတောင်ခြေမှာဆိုတော့ အတော်ကျယ်တယ်။ ​တပ်ဝင်​ပေါက်ရှိတဲ့ ​တောင်ပတ်လမ်းက​တော့ ပိတ်ထားတာကြာပြီ။ ​ကွင်းလမ်းဖြစ်တဲ့ အရှေ့မြို့ပတ်လမ်းကပဲ သွားလို့ရတယ်။ အဲဒီဘက်က​နေ ဝင်ပစ်သွားကြတာ" လို့ ပြောပါတယ်။

တိုက်ခိုက်မှုအပြီးမှာ စစ်တပ်က လမ်းပိတ်စစ်ဆေးခဲ့ပြီး မြို့ထဲမှာ တိုက်ခိုက်ခဲ့ရတာကြောင့် လုံခြုံ​ရေးအရ ချက်ချင်းဆုတ်ခွာလာခဲ့ကာ အထိအခိုက်ကို မသိရသေးဘူးလို့ ဗိုလ်နတ်ဆိုးက ​ပြောပါတယ်။

စစ်ကောင်စီဘက်ကလည်း ဒီဖြစ်စဉ်နဲ့ပတ်သက်လို့ တစုံတရာထုတ်ဖော်ပြောဆိုတာမျိုး မရှိသေးပါဘူး။