နေပြည်တော် - ကန်ပြားကားလမ်းမ၊ ရွှေပန်းတောရွာနား ကားလမ်းကွေ့တခုမှာ မေ  ၂၁ ရက် မနက် ၁၀ နာရီလောက်က မန္တလာမင်းခရီးသည်တင်ကားနဲ့ ဟိုက်ဂျက်ကားတစီး တိုက်မှု ဖြစ်ပွား ခဲ့တယ်လို့ မကွေးမြို့မြေပြင်လူမှုကယ်ဆယ်ရေးအသင်းဆီက သိရပါတယ်။

ရန်ကုန်ကိုထွက်ခွာလာတဲ့  မန္တလာမင်းကားနဲ့ မကွေးမြို့ကိုသွားမယ့် ဟိုက်ဂျက်ကားတို့ တိုက်မိခဲ့ တာဖြစ်ပါတယ်။

ယာဉ်တိုက်မှုကြောင့် Hijet ယာဉ်ပေါ်ပါ ခရီးသည် ကျား ၄ ဦး၊ မ ၇ ဦး စုစုပေါင်း ၁၁ ဦးအနက် ကျား ၁ ဦး၊ မ ၃ ဦး သေဆုံးခဲ့ပြီး ကျား ၃ ဦး၊ မ ၄ ဦး  ထိခိုက်ဒဏ်ရာ ရရှိခဲ့လို့ မနောဖြူလူမှုကူညီရေးနဲ့ ခေမာလူမှုကူညီရေးအသင်းတို့က မြို့သစ်မြို့နယ်ဆေးရုံသို့ ပို့ဆောင်ပေးခဲ့တယ်လို့ မြို့သစ်မြို့နယ် မီးသတ်စခန်း ထုတ်ပြန်ချက်အရ သိရပါတယ်။

မကွေးမြို့မြေပြင်လူမှုကယ်ဆယ်ရေးအသင်းဝင်တဦးက “ဟိုက်ဂျက်က နေပြည်တော် ကုတင် (၁၀၀၀) ကနေ ဆေးရုံဆင်းလာပြီး စလင်းမြို့ကို ပြန်လာရင်း အခုလို ဖြစ်တာပါ။ ကလေးငယ်တဦး လည်း ပေါင်းရိုးကျိုးသွားပါတယ်။”လို့ ဆိုပါတယ်။

သေဆုံးခဲ့သူ အမျိုးသမီး ၃ ဦးမှာ အသက် ၄၀ ကျော်အရွယ်နဲ့ အသက် ၆၀ ကျော်အရွယ်တွေ ဖြစ်တယ်လို့ သိရပြီး Express ခရီးသည်တင်ကားကတော့ ယာဉ်မောင်းနေရာ မထိဘဲနဲ့ စပယ်ယာပါတဲ့ ဖက်ကိုထိသွားလို့ ထိခိုက်ဒဏ်ရာ ရရှိသူ မရှိဘူးလို့ ပြောပါတယ်။

နေပြည်တော် - ကံပြားကားလမ်း(အဝေးပြေးကားလမ်း) ၊ မိုင်တိုင် ၃၉ မိုင်နေရာကစပြီး လမ်းပိုင်းကျဥ်းမြောင်းမှုတွေကြောင့် ယာဥ်မတော်တဆမှုတွေ မကြာခဏဆိုသလို ဖြစ်ပွားနေတာပဲ ဖြစ်ပါတယ်။