မန္တလေး၊ အောင်မြေသာစံမြို့နယ်၊ သီရိမာလာအရှေ့ရပ်ကွက်၊ အကွက် ၁၈၉၊ ၈၇ လမ်းနဲ့ ၂၃×၂၄ လမ်းကြားရှိ အဆောက်အဦမှာ မေ ၁၉ ရက် မနက်အစောပိုင်းက မီးလောင်မှု ဖြစ်ပွားခဲ့တယ်လို့ မန္တလေးဗဟိုမီးသတ်ဌာနက ပြောပါတယ်။

မနက်အစောပိုင်း ၂ နာရီခွဲလောက်က မီးလောင်မှုသတင်းရရှိခဲ့တာကြောင့် အောင်မြေသာစံမြို့နယ်မီးသတ်၊ သီရိမာလာ (အရှေ့၊ အနောက်) မီးသတ်၊ သက်ဆိုင်ရာ မီးသတ်ယာဉ်တွေနဲ့ အရပ်ဘက်ကယ်ဆယ်ရေးအသင်းတွေက ဝိုင်းဝန်းငြှိမ်းသတ်ခဲ့ကြတာပါ။

မြို့ခံကယ်ဆယ်ရေးအသင်း ယာဉ်တာဝန်ခံက “ဘုရားကျောင်းနားက အထည်လုပ်ငန်းလုပ်တဲ့ အိမ်ပါ။ အတွင်းပိုင်း တထပ်လုံး ပစ္စည်းတွေရော၊ အခန်းရော လောင်သွားတယ်။ ဝါယာရှော့ဖြစ်ပြီး လောင်သွားတာ၊ လူထိခိုက်မှု မရှိပါဘူး” လို့ ဆိုပါတယ်။

အဆိုပါ အဆောက်အဦဟာ ၁ ထပ် အုတ်တိုက်အမျိုးအစားဖြစ်ကာ အထည်လုပ်ငန်း ဖွင့်လှစ်ထားတယ်လို့ သိရပြီး အခန်းအတွင်း သွယ်တန်းထားတဲ့ လျှပ်စစ်ကြိုးတွေကနေ အပူလွန်ကဲကာ မီးစလောင်ခဲ့တာလို့ သိရပါတယ်။

မီးလောင်မှုကြောင့် အထည်တွေ၊ ဆိုင်သုံးပစ္စည်းတွေနဲ့ အိမ်တခုလုံး ပျက်စီးဆုံးရှုံးသွားပြီး လူထိခိုက်မှု မရှိဘူးလို့ သိရပါတယ်။

မီးလောင်တဲ့နေရာကို မြို့နယ်အရန်မီးသတ်ယာဉ် ၆ စီး၊ ရေသယ်ယာဉ် ၂ စီးနဲ့ ကယ်ဆယ်ရေးအသင်းတွေက ငြှိမ်းသတ်ပေးခဲ့တာကြောင့် မနက် ၃ နာရီလောက်မှာ မီးငြိမ်းသွားတယ်လို့ သိရပါတယ်။

ပျက်စီးဆုံရှုံးမှုတန်ဖိုးကို တွက်ချက်နေဆဲဖြစ်တယ်လို့ သိရပြီး မီးလောင်မှုဖြစ်ပေါ်ခဲ့တဲ့ လုပ်ငန်းပိုင်ရှင်ကို အောင်မြေသာစံမြို့နယ်ရဲစခန်းမှာ သက်ဆိုင်ရာဥပဒေပုဒ်မနဲ့ အမှုဖွင့်ထားတယ်လို့ သိရပါတယ်။