စစ်ကိုင်းတိုင်း၊ ကလေးမြို့၊ ကလေးတက္ကသိုလ်နဲ့ ချင်းပြည်နယ်၊ ခိုင်ကမ်းမြို့ ရဲစခန်းအနီးမှာ တည်ရှိတဲ့ ဒေသခံမိသားစုဝင်တွေကို ရွှေ့ပြောင်းနေထိုင်ကြဖို့ CDF- Civic Defense Militia -Siyinအဖွဲ့က သတိပေးထားတယ်လို့ ဒေသခံတွေဆီကသိရပါတယ်။

မေ ၁၀ ရက် ဒီနေ့ နောက်ဆုံးထား ရွှေ့ပြောင်းနေထိုင်ပေးကြဖို့နဲ့ ရွှေ့ပြောင်းနေထိုင်တာ မရှိတဲ့ ပြည်သူတွေအနေနဲ့ ထိခိုက်မှုတစုံတရာရှိခဲ့ပါက တာဝန်ယူဖြေရှင်းပေးမှာ မဟုတ်ကြောင်း CDF CDM -Siyin အဖွဲ့က ဆိုထားပါတယ်။

CDF CDM -SIYIN အဖွဲ့ရဲ့ တာဝန်ရှိသူတစ်ဦးက “စစ်ရေးအခြေအနေအရ ရွှေ့ပြောင်းဖို့ မေတ္တာရပ်ခံထားတာပါ။ လက်ရှိအခြေအနေကိုတော့ ပြောပြလို့မရသေးဘူး” လို့ ဒီဗွီဘီကို ပြောပါတယ်။

ကလေးတက္ကသိုလ်နဲ့ ခိုင်ကမ်းရဲစခန်းအနီးမှာ နေထိုင်တဲ့ ပြည်သူတွေအများစုကတော့ ကလေးမြို့ တာဟန်းရပ်ကွက်ဘက်ကို ရွှေ့ပြောင်းနေထိုင်နေကြတယ်လို့ သိရပြီး စစ်ကောင်စီ ရွှေ့ပြောင်းနေထိုင်တဲ့ အိမ်တွေကို မီးရှို့‌မယ်လို့ ပြောဆိုနေတာတွေလည်းရှိတယ်လို့ သိရပါတယ်။

ကလေးတက္ကသိုလ်နဲ့ ခိုင်ကမ်းရဲစခန်းဟာ ကလေး-တီးတိန် ကားလမ်းမပေါ်မှာ တည်ရှိပြီး ချင်းလူမျိုးအများစု နေထိုင်ကြတဲ့ နယ်မြေလည်း ဖြစ်ပါတယ်။