ရန်ကုန်၊ တာမွေမြို့နယ်၊ ပုသိမ်ညွန့်ရပ်ကွက်၊ သတိပဌာန်လမ်းက ၈ ထပ်တိုက်တခုရဲ့ ၇ လွှာအခန်းကနေ ဧပြီ ၂၄ ရက် မနက်အစောပိုင်းမှာ လူတဦး ပြုတ်ကျသေဆုံးခဲ့တယ်လို့ မြို့ခံကယ်ဆယ်ရေးအသင်းက ပြောပါတယ်။
ပြုတ်ကျတဲ့အချိန် မနက်အစောပိုင်း ၂ နာရီ ၁၀ မိနစ်လောက်က မီးပျက်နေတဲ့အချိန် ဖြစ်ပြီး သေဆုံးသူ အမျိုးသားက တိုက်ခန်းအတွင်း ပူနေတာကြောင့် ဝရန်တာတံခါး ထဖွင့်ရာက အရှိန်လွန် ပြုတ်ကျခဲ့တာပါ။
“ပြုတ်ကျတာက ၂ နာရီ ၁၀ မိနစ်လောက်ပါ။ အသင်းက ရောက်သွားတော့ အသက်မမီတော့ဘူး။ မိသားစုက ပြောတာတော့ ပူလို့ ဝရန်တာတံခါးဖွင့်ရင်း အရှိန်လွန်ကျတာလို့ ပြောတယ်။ စံပြဆေးရုံ ပို့ပေးထားပါတယ်” လို့ မြို့ခံကယ်ဆယ်ရေးအသင်းက ပြောပါတယ်။
သေဆုံးသွားတဲ့ အမျိုးသားဟာ အသက် ၂၁ နှစ်သာ ရှိသေးပြီး ကယ်ဆယ်ရေးအဖွဲ့တွေ ရောက်လာချိန် မနက် ၂ နာရီ ၂၀ လောက်မှာ သေဆုံးသွားပါပြီ။
သေဆုံးသူရုပ်အလောင်းကို သင်္ဃန်းကျွန်း စံပြဆေးရုံကို ပို့ဆောင်ပေးထားပြီး တာမွေမြို့နယ်ရဲစခန်းမှာ သေမှုသေခင်း ဖွင့်ထားတယ်လို့ သိရပါတယ်။
ပြီးခဲ့တဲ့ ဧပြီ ၇ ရက်ကလည်း ရန်ကုန်၊ စမ်းချောင်းမြို့နယ်က ၈ ထပ်တိုက်တခုမှာ ပူအိုက်နေလို့ ပြတင်းပေါက်ထဖွင့်တဲ့ အသက် ၂၁ နှစ်အရွယ် အမျိုးသမီးတဦးလည်း ပြုတ်ကျ သေဆုံးခဲ့ပါသေးတယ်။
