တနင်္သာရီတိုင်း၊ မြိတ်ခရိုင်၊ ပုလောမြို့နယ်မှာ သင်္ကြန်လည်ဖို့ အကြောင်းပြချက်နဲ့ ထွက်လာတဲ့ လူငယ် ၂ ဦးကို စစ်ကောင်စီက ပစ်ခတ်ခဲ့တယ်လို့ ဒေသခံတွေဆီကနေ သိရပါတယ်။
ဧပြီ ၁၅ ရက် မနက် ၉ နာရီကျော်လောက်က ပုလောမြို့ကနေ ပလမြို့ မီးလောင် ချောင်းကျေးရွာဘက်ကို သင်္ကြန်လည်ဖို့ ထွက်ခွာလာတယ်ဆိုတဲ့ လူငယ် ၂ ဦးကို တန်းရှင်းကျေးရွာ အုပ်ချုပ်ရေးမှူးလမ်းမှာ ကင်းပုန်းစောင့်နေတဲ့ စစ်ကောင်စီတပ်သားတွေက ပစ်ခတ်ခဲ့တယ်လို့ သိရပါတယ်။
ဒေသခံ တဦးက "အပစ်ခံရတဲ့ နှစ်ယောက်က သမီးရည်းစားတွေတဲ့၊ မီးလောင်ချောင်းရွာမှာ သင်္ကြန်ကျဖို့ဆိုပြီးသွားကြတာ။ တန်းရှင်းပလအုပ်ချုပ်ရေးမှူးလမ်းမှာ ကင်းပုန်းဝပ်နေတဲ့ စစ်သားတွေက ပစ်တာတဲ့။ ကောင်မလေးက ထိသွားတယ်။ သေလား ရှင်လားတော့ မသိသေးဘူး။ ဖမ်းခေါ်သွားတယ်"လို့ ပြောပါတယ်။
အပစ်ခတ်ခံရတဲ့ ၂ ဦးထဲက အမျိုးသမီး ၁ ဦးမှာ ဦးခေါင်း ကျည် ရှပ်ထိမှန်ခဲ့တယ်လို့ သိရပြီးအ ဆိုပါ လူငယ် ၂ ဦး စလုံးကို စစ်ကောင်စီတပ်က မကျည်းကုန်းကျေးရွာကို ဖမ်းဆီးသွားတယ်လို့ သိရပါတယ်။
စစ်အုပ်ချုပ်ရေး ကြေညာထားတဲ့ ပုလောမြို့နယ်ထဲက စစ်ကောင်စီတပ်က ထိန်းချုပ်ထားတဲ့ နယ်မြေတချို့မှာ သင်္ကြန်လာရောက် ရေကစားတဲ့သူတွေအနည်းငယ်သာရှိပြီး ပုလောမြို့ပေါ်မှာ တော့ အခုနှစ် သင်္ကြန်မဏ္ဍပ် ဆောက်လုပ်ထားတာ မရှိပါဘူး။
