စစ်ကိုင်းတိုင်း၊ ရွှေဘိုခရိုင်ရှိ  စစ်ကောင်စီတပ်ရဲ့ မီးရှို့ခံရတဲ့ကျေးရွာက စစ်ရှောင်ကလေးတွေအတွက် သင်ထောက်ကူပစ္စည်းတွေလို အပ်နေတယ်လို့  S&C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့ထံက သိရပါတယ်။

အဲဒီရွာဟာ ၂၀၂၂ ခုနှစ် ဩဂုတ်လက စာသင်ကျောင်းအပါအဝင် မီးရှို့ခံခဲ့ရတာဖြစ်ပြီး အသက် ၅ နှစ်ကနေ ၁၅ နှစ်အရွယ် စစ်ဘေးရှောင်ကလေးငယ် ၂၂၀ ကျော် စာသင်ကြားခွင့် မရခဲ့တဲ့အကြောင်းနဲ့ အခုအခါ စာသင်ဖို့ ဆရာ၊ဆရာမ လုံလောက်မှု ရှိပေမဲ့ စာရေးကိရိယာနဲ့ စာရေးစားပွဲတွေ လိုအပ်နေတယ်လို့ သိရပါတယ်။

S&C အဖွဲ့တာဝန်ရှိသူက "အခုမှ ပြန်လည်ထူထောင်တာဆိုတော့ စာသင်ကြားပေးနေတာက မကြာသေးဘူး။ အခုက စာသင်ခုံတွေနဲ့သင်ထောက်ကူပစ္စည်းတွေ အဓိကလိုနေတာပေါ့။ ဆရာ၊ ဆရာမကတော့ အနီးနားကျေးရွာတွေက CDM တွေနဲ့ ဘွဲ့ရပြီးသား လူငယ်တွေဝိုင်းဝန်း သင်ကြားပေးနေတယ်”လို့ ပြောပါတယ်။

လတ်တလော စာသင်ကြားရာမှာလည်း အဖီဆွဲကာ သင်ကြားနေရတာဖြစ်ပြီး မိုးဒဏ်လေဒဏ် ခံနိုင်ရည် မရှိတာကြောင့် ကျောင်းဆောက်လုပ်နိုင်ဖို့ ပြင်ဆင်နေတယ်လို့ သိရပါတယ်။

အခုချိန်​မှာ မူလတန်းကနေ အလယ်တန်းထိ စာသင်ကြားပေးနေပြီး အခုလို ပြန်လည် ထူထောင်ရေးအတွက် ပြည်တွင်း၊ ပြည်ပက အလှူရှင်တွေအနေနဲ့ ဝိုင်းဝန်း ကူညီပေးကြဖို့လည်း S&C အဖွဲ့မှတာဝန်ရှိသူက မေတ္တာရပ်ခံထားပါတယ်။