မန္တလေးတိုင်း သပိတ်ကျင်းမြို့နယ်ထဲမှာ စစ်ယာဥ်တန်းကို မတ် ၁၁ ရက်မှာ ၃ ကြိမ်မိုင်းဆွဲတိုက်ခိုက်ခဲ့လို့  ထိခိုက်သေဆုံးမှု ရှိတယ်လို့ တကောင်းမြို့နယ်ပြည်သူ့ကာကွယ်ရေး တပ်ဖွဲ့က သိရပါတယ်။ 

မတ္တရာမြို့နယ်ကနေ စစ်ကိုင်းတိုင်းဘက်ကို စစ်ကား ၄၉ စီးနဲ့လာတဲ့ စစ်ယာဥ်တန်းကို သပိတ်ကျင်းမြို့နယ်ထဲမှာ မိုင်းဆွဲတိုက်ခိုက်ခဲ့တာလို့ သိရ​ပါတယ်။ 

တကောင်းမြို့နယ်ပကဖ တာဝန်ရှိသူက "သူတို့တက်လာတယ်လို့ သတင်းရလို့ မိုင်းကြိုတင် ထောင်ပြီး ဆွဲခဲ့တာပါ။ မိုင်းဆွဲတိုက်ခိုက်တော့ သူတို့တွေ ကားတွေရပ်ပြီး ဆင်းတဲ့သူက ဆင်း၊ ကားပေါ်က ပစ်တဲ့ သူက ပစ်ခဲ့ကြပါတယ်"လို့ ပြောပါတယ်။ 

တကောင်းလမ်းဆုံနားက ကျွဲကူးကန်နားမှာ ရှေ့ပြေးစစ်ကား ၃ စီးကို မိုင်း ၅ လုံးနဲ့ ဖောက်ခွဲတိုက်ခိုက်ခဲ့ပြီး စစ်ယာဥ်တန်းက ဆက်လက်မောင်းနှင်သွားတာကြောင့် တကောင်း ၆ မိုင်နားက နောင်လုံသံတံတားနားမှာ  မိုင်း ၃ လုံးနဲ့ ထပ်မံဖောက်ခွဲ တိုက်ခိုက်ခဲ့ပြီး မိနစ် ၃၀ လောက် အပြန်အလှန်ပစ်ခတ်ခဲ့တယ်လို့ တကောင်းပကဖ ကသိရပါတယ်။ 

အပြန်အလှန်ပစ်ခတ်မှုဖြစ်ပြီးနောက် စစ်တပ်က ဆက်လက်မောင်း နှင်သွားရာ အင်ပျံ ကျေးရွာနားမှာ  မိုင်း ၅ လုံးနဲ့ ထပ်မံ ဖောက်ခွဲတိုက်ခိုက်ခဲ့တယ်လို့ သိရပါတယ်။

တာဝန်ရှိသူက "မိုင်းဆွဲတော့ သုံးကြိမ်မြောက်မှာ ကားရှေ့ခြမ်းကို ထိ သွားပြီး ကားမောင်းသမား သေဆုံးတာတော့ မိုင်းသမားမျက်မြင်ပါ။ တခြားထိခိုက်သေဆုံးတာတော့ သူတို့ ကားလေးစီး နဲ့ ပြန်ခေါက်သွားတာကို ​မြေပြင်သတင်းအရသိရတာပါ" လို့ ​ပြောပါတယ်။ 

အဆိုပါ မိုင်းဆွဲတိုက်ခိုက်မှုကို တကောင်းမြို့နယ်ပြည်သူ့ကာကွယ်ရေးတပ်ဖွဲ့နဲ့ TBK တောဆင်ရိုင်းပြောက်ကျားတပ်ဖွဲ့တို့ ပူးပေါင်းလုပ်ဆောင်ခဲ့တာလို့ မတ် ၁၁ ရက်က ထုတ်ပြန်ပါတယ်။