ရန်ကုန်၊ မြောက်ဥက္ကလာပမြို့နယ်ရှိ ဘုန်းတော်ကြီးသင်ပညာရေးကျောင်းက ကွန်ပျူတာနဲ့ အလှူငွေ ခိုးယူခဲ့တဲ့ လူငယ် အမျိုးသား ၃ ဦးကို မြောက်ဥက္ကလာပမြို့နယ်ရဲစခန်းက ဖမ်းဆီးခဲ့ပြီး  ဖေဖော်ဝါရီလ ၂၆ ရက် ညနေမှာ ပိုက်ဆံယူပြီး ပြန်လွှတ်ပေးလိုက်တယ်လို့  ဒေသခံတွေက ပြောပါတယ်။

ပုရွက်ဆိပ်ကုန်းရပ်ကွက်၊ ရွာဦးလမ်းရှိ ဓမ္မောဒယ ဘုန်းတော်ကြီးသင်ပညာရေးကျောင်းက ဘ/က ကျောင်း ဦးဇင်းတစ်ပါးရဲ့ လက်တော့ကွန်ပျူတာနဲ့ အလှူ‌ငွေ ကျပ် ၇ သိန်းကျော် ဖေဖော်ဝါရီ ၂၀ ရက်နေ့မှာ ပျောက်ဆုံးသွားလို့ မြောက်ဥက္ကလာပရဲစခန်းမှာ အမှုဖွင့်ခဲ့တာဖြစ်ပြီး ၂၂ ရက် ည ၁၀ နာရီဝန်းကျင်က ဧည့်စာရင်းစစ် ဝင်ဖမ်းရာက ခိုးယူသူတွေကို ဖမ်းမိခဲ့တာပါ။  

ရပ်ကွက်နေသူတစ်ဦးက"ပြီးခဲ့တဲ့ တနင်္လာနေ့က ကျောင်းဖွင့်ချိန် ဖြစ်သွားတာ၊ ကျောင်းကို မိဘတွေတောင် ပေးမဝင်ခိုင်းဘူး၊ မုန့်စားဆင်းချိန် ဦးထုပ်အမဲဆောင်းထားတဲ့ လူငယ်တစ်ဦး ကျောင်းထဲ ဝင်သွားတာကို CCTV က တွေ့လိုက်တာနောက်ဆုံးပဲ။ အပြင်လူတော့ မဝင်ဘူး၊ ညနေလောက်မှ ဘုန်းကြီး ပိုက်ဆံနဲ့ ကွန်ပျူတာပျောက်တယ်လို့ သိရတာ။ ဖြစ်ဖြစ်ချင်း ရဲကို တိုင်ထားတော့ ရပ်ကွက်ထဲက မသင်္ကာတဲ့ တစ်ယောက်ကို စစ်ရင်း ၃ ယောက်စလုံး မိသွားတာ။ ကွန်ပျူတာ သွားရောင်းပေးတဲ့ အမျိုးသမီးကိုပါ ဖမ်းထားတာ။ သူ့ကို အရင်ပြန်လွှတ်ပေးလိုက်တယ်။ ကွန်ပျူ တာဝယ်တဲ့လူကို ပြန်ရှာ‌မတွေ့တော့ဘူး။ ဘုန်းကြီးက အထဲကဒေတာပဲ ပြန်လိုချင်တာလို့ ပြောတယ်။ မနေ့က ရပ်ကွက်လူကြီးတွေရယ်၊ အာမခံပေးမယ့် သူရယ်၊ တစ်ဦးကို ကျပ်  ၅ သိန်းစီနဲ့ ပြန်ထုတ်လာတယ်လို့ကြားတယ်၊ အရင်တစ်ခါကလည်း ရုံးခန်းမှာ ခံဝန်ထိုးထားတာ"လို့ ပြောပါတယ်။  

ခိုးမှုထဲပါဝင်နေတဲ့ ၁၈ နှစ်အရွယ်အမျိုးသားတစ်ဦးက ရပ်ကွက်ထဲက ဘင်ဂိုဝိုင်းတွေမှာ ၁၀, ၀၀၀ တန် အုပ်ကိုင်ဆောင်ကစားရာကနေ ခိုးမှုကို ရပ်ကွက်က သတင်းပေးလို့ ဖမ်းဆီးရမိခဲ့တာလို့ သိရပါတယ်။

အဲ့ဒီလူငယ် ၃ ဦးဟာ ရပ်ကွက်က ခိုးယူမှုတွေမှာ ပါဝင်ခဲ့သူတွေ ဖြစ်တာကြောင့် ရပ်ကွက်ရုံးမှာ ခံဝန်ထိုးထားရသူတွေလို့ သိရပြီး အခုဖြစ်စဥ်မှာ ရဲစခန်းက ဖမ်းဆီးပြီး ၄ ရက်အကြာမှာ ကျပ် ၅ သိန်းစီနဲ့ ပြန်လွတ်လာခဲ့တာ ဖြစ်ပါတယ်။