မန္တလေးတိုင်း၊ မိုးကုတ်မြို့အနောက်ပိုင်း ကသဲကျေးရွာအုပ်ချုပ်ရေးမှူးရုံးကို ဖေဖော်ဝါရီ ၂၃ ရက် ဒီနေ့မနက် ၅ နာရီလောက်က ဝင်ရောက်တိုက်ခိုက်ခံခဲ့ရာမှာ စစ်ကောင်စီတပ်က ၃ ဦးသေဆုံးကာ ၁ ဦး ဒဏ်ရာရခဲ့တယ်လို့ Red Wolf of Mogok အဖွဲ့ တာဝန်ရှိသူကပြောပါတယ်။
ကသဲကျေးရွာအုပ်ချုပ်ရေးမှူးရုံးကို ၄၀ မမ လက်နက်ကြီး ၆ လုံးနဲ့ ဝင်ရောက်တိုက်ခိုက်ပြီးနောက် လက်နက်ငယ်နဲ့ ၁၅ မိနစ်လောက် ပစ်ခတ်ခဲ့တာလို့လည်း ပြောပါတယ်။
ပစ်ခတ်တိုက်ခိုက်ခံရမှုကြောင့် အုပ်ချုပ်ရေးမှူးရုံး ခေါင်မိုးတွေ ပွင့်ထွက်သွားပြီး နံရံမှာလည်း ကျည်ထိမှန်ရာတွေ တွေ့မြင်ခဲ့ရတယ်လို့ မျက်မြင်ဒေသခံတဦးက ပြောပါတယ်။
“ဒီနေ့မနက် ငါးနာရီလောက် အသံကြားတာ ဆက်တိုက်ပဲ။ ပေါက်ကွဲသံတွေကော ပစ်ခတ်သံတွေကော ကြားတာ။ ထိခိုက်မှုကတော့ မသိရဘူး” လို့ ကသဲကျေးရွာအုပ်စုမှ ဒေသခံတဦးက ပြောပါတယ်။
အုပ်ချုပ်ရေးမှူးရုံး တိုက်ခိုက်ခံရပြီးနောက် စစ်ကောင်စီတပ်သားတွေ လမ်းပိတ်စစ်ဆေးတာတွေကို မွန်းလွဲပိုင်းအထိ ပြုလုပ်ခဲ့တယ်လို့ သိရပါတယ်။
ကသဲကျေးရွာအုပ်ချုပ်ရေးမှူးရုံးမှာ စစ်ကောင်စီတပ်သားတွေ နေ့ရောညပါ တပ်စွဲထားကြတယ်လို့ မြို့ခံတွေက ပြောပါတယ်။
