ရှမ်းပြည်နယ်တောင်ပိုင်း၊ ဖယ်ခုံမြို့နယ်၊ မိုးဗြဲအနောက်ခြမ်းမှာ မူးယစ်ဆေးဝါးရောင်းချနေသူ ၁ ဦးနဲ့ သုံးစွဲသူတွေကို စိတ်ကြွမူးယစ်ဆေးပြား WY အလုံး ၅၀၀ ကျော်နဲ့အတူ ဖေဖော်ဝါရီ ၁၁ ရက်က ဖမ်းဆီးရမိခဲ့တယ်လို့ မိုးဗြဲ - PDF တပ်ရင်း-၂ က ထုတ်ပြန်ပါတယ်။

ဒေသခံတွေရဲ့ သတင်းပေးချက်အရ မူးယစ်ဆေးဝါး ရောင်းချသုံးစွဲနေသူတွေကို ဝင်ရောက်ဖမ်းဆီးခဲ့တာဖြစ်ပြီး သုံးစွဲသူတွေကို ခံဝန်ကတိနဲ့ ပြန်လွှတ်ပေးခဲ့ကာ ရောင်းချသူ ၁ ဦးကို နောက်ဆက်တွဲကွင်းဆက်တွေ ဆက်လက်ဖမ်းဆီးနိုင်ရေးအတွက် ထိန်းသိမ်းထားတယ်လို့ မိုးဗြဲ -PDF ကပြောပါတယ်။

ရောင်းချသူများကို သတ်မှတ်ထားတဲ့ စည်းကမ်းချက်အရ ဒဏ်ငွေ ၁ ဆမှ ၃ ဆအထိ ပေးလျော်ဖို့ စီရင်ချက်ချမှတ်ကာ ထိုဒဏ်ငွေတွေအားလုံးကိုလည်း မိုးဗြဲပြည်သူ့ကာကွယ်ရေးတပ် ၂ မှ တပြားတချပ်မှမယူဘဲ ရပ်ရွာအတွင်း လိုအပ်နေတဲ့ ကျန်းမာရေး၊ ပညာရေး စတဲ့ ကိစ္စရပ်တွေ ပြန်လည်အသုံးပြုရန်အတွက် ကျေးရွာရှိ မိဘပြည်သူထံသို့ ပြန်လည်အပ်နှံခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

မိုးဗြဲ - PDF တပ်ရင်း-၂ အနေနဲ့ မူးယစ်ဆေးဝါး ဖမ်းဆီးရမှုဟာ ၁၀ ကြိမ်မြောက် ရှိပြီဖြစ်ပြီး ပြီးခဲ့တဲ့ ဖေဖော်ဝါရီ ၈ ရက်ကလည်း မိုးဗြဲ အရှေ့ဘက်ကမ်းတနေရာမှာ KNDF တပ်ရင်း-၃ က စိတ်ကြွမူးယစ်ဆေးပြား ၁,၀၀၀ ခန့် ဖမ်းဆီးရမိခဲ့ပါသေးတယ်။