မကွေးတိုင်း၊ ပခုက္ကူမြို့နယ်မှာ ဖေဖော်ဝါရီ ၁ ရက် ညနေပိုင်းက ကမ္မမြို့လျှပ်စစ်မှူးနဲ့ ပျူစောထီးတွေ တိုက်ခိုက်ခံရပြီး ၂ ဦးသေဆုံးကာ ၃ ဦး ဒဏ်ရာရရှိခဲ့တယ်လို့ မြိုင် ပ.က.ဖ ကနေ သိရပါတယ်။

မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက “ပခုက္ကူမြို့နယ် ကမ္မမြို့လျှပ်စစ်မှူးနဲ့ မြိုင်မြို့နယ် တွင်းမက ပျူ ၅ ယောက်ကို ဖေဖော်ဝါရီလ ၁ ရက်နေ့ ညနေ ၆ နာရီလောက်က ပခုက္ကူဂျင်ဝိုင်းကနေ ကံမမြို့ဘက်ကို အိမ်စီးကား ၂ စီးနဲ့ ပြန်လာတဲ့အချိန် ကျနော်တို့ရဲဘော်တွေက တားစီးစစ်ဆေးဖို့ လုပ်တဲ့အချိန်မှာ ကားနဲ့တိုက်ပြေးဖို့ လုပ်တာကြောင့် ပစ်ခတ်တိုက်ခိုက်လိုက်တာ” လို့ ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်းမှာ စစ်ကောင်စီလက်အောက်ခံ ပျူစောထီး ၂ ယောက် သေဆုံးပြီး ကမ္မမြို့လျှပ်စစ်မှူးနဲ့ ပျူစောထီး ၂ ယောက် ဒဏ်ရာရရှိကာ ကားတစီးနဲ့ ထွက်ပြေးလွတ်မြောက်သွားတယ်လို့ ဆိုပါတယ်။

အဲဒီလျှပ်စစ်မှူးက လောင်းကစားရှုံးရင် ပြည်သူတွေဆီက လျှပ်စစ်မီတာ အခွန်အခတွေကို ဆက်ကြေးပုံစံမျိုး အတင်းအဓမ္မ ကောက်ခံနေလို့ ပြည်သူတွေဆီကနေ သုတ်သင်ပေးဖို့ သတင်းပေးတဲ့အတွက် အကြိမ်ကြိမ် ကြိုးစားခဲ့တယ်လို့ ဗိုလ်လက်ယာက ဆိုပါတယ်။

ကျည်ထိမှန်သွားတဲ့ကားကတော့ ဖေဖော်ဝါရီ ၂ ရက်နေ့အထိ ပျူအလောင်း ၂ လောင်းနဲ့အတူ ကန်တော်ရွာနဲ့ ကမ္မကြားမှာရှိနေပြီး အဲဒီကားကို မွန်းလွဲ ၂ ရီလောက်မှာ လာယူတဲ့ စစ်သားတွေကို ဒရုန်းနဲ့ ဗုံးကြဲတိုက်ခိုက်ခဲ့ရာမှာ ထွက်ပြေးသွားလို့ ကားက ဒီအတိုင်း ရှိနေသေးပြီး ကားဘေးကနေ လျှပ်စစ်မှူးရဲ့ လက်ကိုင်ဖုန်းကို သိမ်းဆည်းနိုင်ခဲ့တယ်လို့ ဆိုပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသမှာ စစ်ကောင်စီတပ်ကို ဖေဖော်ဝါရီ ၁ ရက် နေ့လယ်ပိုင်းကနေ ညနေပိုင်းအထိ ဒရုန်းနဲ့ ဗုံးကြဲတိုက်ခိုက်ခဲ့လို့ ထိခိုက်သေဆုံးသူ များပြားနိုင်တယ်လို့ ပခုက္ကူခရိုင် အမှတ်-၁၀ တပ်ရင်း၊ တပ်ခွဲ ၃ - ဖီးနစ်အထူးပြောက်ကျား တပ်ဖွဲ့ကနေ သိရပါတယ်။

ရေစကြိုမြို့နယ်၊ ရေလယ်ကျွန်းဒေသ၊ မင်းရွာမှာတပ်စွဲထားတဲ့ စစ်ကောင်စီတပ်ကို ဖေဖော်ဝါရီ ၁ ရက် နေ့လယ် ၁၁ နာရီ ၅၀ မိနစ်ကနေ ညနေ ၃ နာရီခွဲအထိ ဒေသကာကွယ်ရေး ပူးပေါင်းတပ်ဖွဲ့တွေက ဒရုန်းနဲ့ ဗုံးကြဲတိုက်ခိုက်ခဲ့တယ်လို့ ဖီးနစ်အထူးပြောက်ကျားတပ်ဖွဲ့ တာဝန်ခံက ဒီဗွီဘီကို ပြောပါတယ်။

“အဲဒီစစ်သားတွေကို မဟာမိတ်တွေနဲ့ စုဖွဲ့ထားတဲ့ Drone Team က နည်းပညာရှင်တွေ ဖန်တီးထားတဲ့ 1Kg အလေးချိန် သယ်ဆောင်နိုင်တဲ့ ဒရုန်းနဲ့ ၆၀ မမ ဗုံးသီး ၆၂ လုံး ဖြုတ်ချတိုက်ခိုက်ခဲ့လို့ စစ်ကောင်စီဘက်က ထိခိုက်သေဆုံးသူ များပြားနိုင်ပေမဲ့ အတိအကျ မသိရသေးလို့ ဆက်လက်စုံစမ်းနေတယ်။ အဲဒီတိုက်ခိုက်မှုဟာ စစ်အာဏာသိမ်း ၂ နှစ်ပြည့် အထိမ်းအမှတ်အနေနဲ့ ဒီအချိန်အတိုင်းတာထိ ကျနော်တို့မှာ လုပ်နိုင်တဲ့ အင်အားနဲ့ နည်းပညာတွေ ပေါင်းစပ်ပြီး မြေပြင်မှာ အကောင်းဆုံးလုပ်နိုင်တယ်ဆိုတာ ပြသတာ။”

ဒါ့အပြင် အဲဒီ မင်းရွာမှာ တပ်စွဲထားတဲ့ စစ်ကောင်စီတပ်သားတွေကို ဇန်နဝါရီ ၃၁ ရက် ည ၁၀ နာရီကနေ ဖေဖော်ဝါရီ ၁ ရက် မနက် ၄ နာရီအထိ ဒေသကာကွယ်ရေး ပူးပေါင်းတပ်ဖွဲ့တွေက ၆၀ မမ အလုံး ၄၀ နဲ့ ပစ်ခတ်တိုက်ခိုက်ခဲ့လို့ စစ်ကောင်စီဘက်က ထိခိုက်သေဆုံးသူ ရှိနိုင်တယ်လို့ ဆိုပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။