တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်၊ မရင်းကြီးကျေးရွာမှာ စစ်ကောင်စီတပ်နဲ့ ဒေသခံ ကာကွယ်ရေးပူးပေါင်းတပ်တို့ ဇန်နဝါရီ ၂၉ ရက်က တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။

မရင်းကြီးရွာထဲကို စစ်ကြောင်းထိုးလာတဲ့ စစ်ကောင်စီတပ်နဲ့ ဒေသခံ ကာကွယ်ရေး ပူးပေါင်းတပ်တွေ နာရီဝက်ကြာ တိုက်ပွဲဖြစ်ပွားခဲ့တယ်လို့ ဒေသခံ ကာကွယ်ရေးတပ်ဖွဲ့ဝင်တွေက ပြောပါတယ်။

ဒေသခံကာကွယ်ရေးတပ်ဖွဲ့ဝင်တဦးက “သူတို့ဘက်က စစ်ကြောင်းထိုးလာတာမျိုးရှိရင် ပြည်သူတွေ အတတ်နိုင်ဆုံး ဘေးလွတ်ရာကို ရှောင်နေကြဖို့ သတိပေးချင်ပါတယ်။ သူတို့နဲ့ ထိပ်တိုက်တွေ့တာမျိုး မရှိရအောင် နယ်တွေဘက်က ရွာသားတွေကို သတိပေးလိုပါတယ်” လို့ ပြောပါတယ်။

စစ်ကောင်စီတပ်က ဇန်နဝါရီ ၂၈ ရက်မှာ မရင်းကြီးရွာကို လက်နက်ကြီးနဲ့ ပစ်ခတ်တာကြောင့် စာသင်ကျောင်း ထိခိုက်သွားတယ်လို့လည်း ဒေသခံအမျိုးသမီးတဦးက ဆိုပါတယ်။

တနင်္သာရီမြို့နယ်ထဲမှာ စစ်ကောင်စီတပ်တွေနဲ့ ဒေသခံ ပြည်သူ့ကာကွယ်ရေး ပူးပေါင်းတပ်ဖွဲ့တွေ ဇန်နဝါရီ ၂၃ ရက်ကနေ ၂၅ ရက်အထိ တိုက်ပွဲဖြစ်ပွားရာ လူ ၃,၀၀၀ ကျော် ထွက်ပြေးနေရတယ်လို့ သိရပါတယ်။

မြိတ်ခရိုင်၊ ပုလောမြို့နယ်မှာတော့ ကျောက္ကာကျေးရွာရှိ စစ်တပ်နဲ့ နီးစပ်သူတဦး လုပ်ကိုင်နေတဲ့ ခရုဖောင် ဒေသခေါ် ဂျင်းခရုဖောင် ၅ ခုကို ဒေသခံ ပြည်သူ့ကာကွယ်ရေးတပ်တွေက ဇန်နဝါရီ ၂၉ ရက် နေ့လယ်ပိုင်းမှာ မီးရှို့ခဲ့ပြီး အပြန်အလှန် ပစ်ခတ်မှုဖြစ်ပွားတယ်လို့ ဒေသခံတွေက ပြောပါတယ်။

“အဲဒီဂျင်းဖောင်ပိုင်ရှင်က စစ်တပ်နဲ့တွဲပြီး လုပ်ကိုင်နေတာ။ သေနတ်လည်းကိုင်ထားတယ်။ ပြည်သူတွေကိုယ်တိုင်က မျက်မြင်သက်သေနဲ့တကွ တိုင်တာ။ ကျနော်တို့ ဂျင်းခရုဖောင်ကို ရောက်တော့ ပိုင်ရှင်ကိုတော့ မတွေ့ဘူး။ ဂျင်းခရုဖောင်မှာ လုပ်နေတဲ့သူတွေကျတော့ ပြေးတာပေါ့။ ကျနော်တို့လည်း ဂျင်းဖောင်ကို မီးရှို့ထားခဲ့တယ်” လို့ ပြည်သူ့ကာကွယ်ရေးတပ်တွေက ပြောပါတယ်။

ပြည်သူ့ကာကွယ်ရေးတပ်ဖွဲ့တွေ မီးရှို့ပြီးပြန်လာတော့ ရွာထဲမှာရှိတဲ့ ပျူစောထီးတွေက ဘုရားပေါ်ကနေ ပစ်ခတ်တဲ့အတွက် မိနစ် ၃၀ လောက် နှစ်ဖက်ပစ်ခတ်မှု ဖြစ်ပွားခဲ့တယ်လို့လည်း သိရပါတယ်။

နီးစပ်ရာဒေသခံတဦးက “ရွာဘုရားပေါ်ကနေ ပျူစောထီးတွေ သေနတ်ပစ်သံကိုတော့ ကြားရတယ်။ ကျနော်တို့က သေနတ်သံကြားရင် ကြောက်တာပေါ့။ နောက်တော့ စစ်တပ်နဲ့ဆက်စပ်တဲ့ ဂျင်းဖောင်ကို PDF တွေက မီးရှို့ခဲ့တယ်လို့ကြားတယ်” လို့ ပြောပါတယ်။

ပုလောမြို့နယ်ထဲက ကျေးရွာတော်တော်များများမှာ ဂျင်းခရုလုပ်ငန်းကို အဓိက လုပ်ကိုင်နေကြပြီး ဂျင်းခရုလုပ်ပိုင်ခွင့်နဲ့ ပတ်သက်လို့ ဒေသခံတွေနဲ့ လုပ်ငန်းရှင်အကြား မကြာခဏ ပြဿနာဖြစ်ပွားနေတဲ့အတွက် ဒေသခံ ပြည်သူ့ကာကွယ်ရေးတပ်ဖွဲ့ကလည်း အရင်ကတည်းက သတိပေးစာတွေ ထုတ်ပြန်ထားတာလည်း ရှိပါတယ်။

ဇန်နဝါရီ ၃၀ ရက် ည ၁၂ နာရီ‌ကျော်လောက်က မြိတ်မြို့နယ်၊ မြိတ်တောင်ကျေးရွာနဲ့ မြိတ်တောင်နယ်မြေရှိ ရပ်ကွက်တချို့က နေအိမ်တွေကို စစ်ကောင်စီတပ်က ဝင်ရောက်စစ်ဆေးတာတွေ လုပ်ခဲ့တယ်လို့ ဒေသခံပြည်သူတွေဆီက သိရပါတယ်။

မြို့သစ်ရပ်ကွက်နဲ့ အင်းလေးမြိုင်ရပ်ကွက်ရှိ နေအိမ်တွေကို စစ်ကောင်စီတပ်က အင်အားအများအပြားနဲ့ ဧည့်စာရင်း ဝင်ရောက်စစ်ဆေးတယ်လို့ သိရပြီး နေအိမ်တချို့ကိုလည်း တံခါးတွေရိုက်ချိုးကာ စစ်ဆေးတာတွေ လုပ်ခဲ့တယ်လို့ ရပ်ကွက်နေပြည်သူတဦးက ဆိုပါတယ်။

“အိမ်တံခါးတွေ လာရိုက်ဖွင့်တာပါ။ ဘာဖြစ်လို့လဲမေးလိုက်တော့ လူလာရှာတာတဲ့။ ဘယ်သူ့ကိုရှာလဲ မသိဘူး။ လူရှာမတွေ့တော့ ဧည့်သည်ရှိလား မေးပြီးတော့ ဧည့်စာရင်းတောင်းပြီး ထပ်စစ်တယ်။ ယောကျ်ားတွေဆို လူခေါ်ပြရတယ်။ တခြားရပ်ကွက်တွေမှာလည်း စစ်သေးတယ်။ အိမ်ရိုက်ဖွင့်သံတွေလည်း ကြားရတယ်။ ကျောက်ခဲနဲ့ ကောက်ပေါက်သံလည်း ကြားရတယ်။”

အရင်က အဆိုပါရပ်ကွက်တွေမှာ အခုလို အင်အားအများအပြားနဲ့ ဝင်ရောက်စစ်ဆေးတာမျိုး မရှိ‌‌ပေမဲ့ သက်ဆိုင်ရာ ရပ်ကွက်အုပ်ချုပ်ရေးမှူးကိုတော့ ဧည့်စာရင်း တိုင်ကြားထားရတယ်လို့ သိရပါတယ်။

ပြီးခဲ့တဲ့ရက်ပိုင်းက မြိတ်မြို့နယ်ရှိ ကောင်းထက်စံကေတီဗွီမှာ အမျိုးသား ၃ ဦးက တခြားအမျိုးသား ၁ ဦးကို သေနတ်နဲ့ပစ်သတ်ပြီး ထွက်ပြေးသွားပြီးနောက် စစ်ကောင်စီတပ်က နေရာအနှံ့ စစ်ဆေးခဲ့ပါတယ်။