တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်ထဲက ကျေးရွာမှာ ဇန်နဝါရီ ၂၆ ရက်က လူဦးရေ ၇၀ ကျော်ပါတဲ့ လောင်းကစားဝိုင်းကို လောင်းလုံးမြို့နယ် ပြည်သူ့ကာကွယ်ရေး တပ်ဖွဲ့က ဝင်ရောက်ဖမ်းဆီးခဲ့တယ်လို့ လောင်းလုံးမြို့နယ် ပကဖ (LLPDF) က သတင်းထုတ်ပြန်ပါတယ်။

လောင်းလုံးမြို့နယ်ထဲမှာ စစ်ကောင်စီတပ်ဖွဲ့ကို အခွန်ဘဏ္ဏာရှာပေးနေတဲ့ လုပ်ရပ်တွေနဲ့ စစ်ကောင်စီအလိုကျ လောင်းကစားဝိုင်းတွေ မပြုလုပ်ဖို့ ၃ ကြိမ်ထက်မနည်း သတင်းထုတ်ပြန်ထားပြီး အဲဒီနောက်မှာတော့ အခုလို စည်စည်ကားကား ကျင်းပနေတဲ့ လောင်းကစားဝိုင်းကို သွားရောက်ဖမ်းဆီးခဲ့ရာမှာ လောင်းကစားဝိုင်း ဦးဆောင်သူ အပါအဝင် ၅၀ ကျော်ခန့် ထွက်ပြေးလွတ်မြောက်သွားပြီး အယောက် ၂၀ လောက်ကိုတော့ ဖမ်းဆီးရမိခဲ့တယ်လို့ LLPDF က ဆိုပါတယ်။

ဖမ်းဆီးရမိသူတွေနဲ့အတူ ကျပ်ငွေ ၁၂ သိန်းကျော်နဲ့ ထိုင်းဘတ်ငွေ ၂,၃၆၀ ဘတ်ကို သိမ်းဆည်းရမိခဲ့တဲ့အတွက် အဲဒီငွေတွေကို စစ်ကောင်စီတပ်တွေကို တိုက်ခိုက်တဲ့နေရာမှာ အသုံးပြုတဲ့ ကျည်ဆန်တွေ ဝယ်ယူသွားမှာဖြစ်တယ်လို့လည်း သိရပါတယ်။

လောင်းလုံးမြို့နယ်ထဲမှာ စစ်ကောင်စီအလိုကျ လောင်းကစားဝိုင်းတွေ ထပ်ပြီး ပြုလုပ်နေမယ်ဆိုရင် ပြင်းပြင်းထန်ထန် အရေးယူသွားမှာဖြစ်တယ်လို့လည်း လောင်းလုံးမြို့နယ် ပကဖ က ထပ်ပြီး သတိပေးထားပါတယ်။