မွန်ပြည်နယ်၊ ဘီးလင်းမြို့နယ်၊ ရွှေအင်တုံကျေးရွာအနီး ရန်ကုန်-မော်လမြိုင်ကားလမ်းပေါ်မှာ ဖြစ်ပွားခဲ့တဲ့ အပြန်အလှန် ပစ်ခတ်မှုမှာ စစ်ကောင်စီတပ်ဖွဲ့ဝင် ၇ ဦး သေဆုံးပြီး ၃ ဦး ဒဏ်ရာရရှိခဲ့တယ်လို့ သထုံခရိုင် PDF တာဝန်ခံ ကိုအေးမင်းထွန်းက ဒီဗွီဘီကို ပြောပါတယ်။

မနေ့ ဇန်နဝါရီ ၁၀ ရက် မွန်းတည့် ၁၂ နာရီအချိန်က သထုံမြို့နယ်ကနေ ဘီးလင်းမြို့နယ်ထဲ မောင်းဝင်လာတဲ့ စစ်ကောင်စီယာဉ်တန်းကို ကရင်အမျိုးသားလွတ်မြောက်ရေးတပ်မတော် KNLA ပူးပေါင်းတပ်ဖွဲ့က မိုင်းဆွဲတိုက်ခိုက်ပြီးနောက် နှစ်ဖက်အပြန်အလှန် ပစ်ခတ်မှု ဖြစ်ပွားခဲ့တာပါ။

အချိန် ၁ နာရီခွဲကျော်ကြာ ဖြစ်ပွားခဲ့တဲ့ နှစ်ဖက်ပစ်ခတ်မှုအတွင်း စစ်ကောင်စီ ကား ၂ စီးထိခိုက်ပျက်စီးခဲ့သလို စစ်ကောင်စီတပ်ဖွဲ့ဝင် ၇ ဦး သေဆုံးပြီး ၃ ဦး ဒဏ်ရာရရှိခဲ့ပြီး KNLA ပူးပေါင်းတပ်ဖွဲ့ဘက်ကတော့ အထိအခိုက် မရှိ ပြန်လည် ဆုတ်ခွာနိုင်ခဲ့ပါတယ်။

စစ်ကောင်စီတပ်နဲ့နီးစပ်သူတွေအဆိုအရ အဲဒီပစ်ခတ်မှုကို စစ်ကောင်စီ အမှတ် (၃၁၄) အမြောက်တပ် နဲ့ ခမရ(၃) တပ်ရင်းတွေက စစ်ကူသွားပေးခဲ့တယ်လို့ ဆိုပါတယ်။

အဲဒီပစ်ခတ်မှုကြောင့် ရန်ကုန်-မော်လမြိုင်ကားလမ်းပေါ်မှာ ခရီးသွားကား ရာနဲ့ချီ ပိတ်မိခဲ့သလို ဒီနေ့ ဇန်နဝါရီ ၁၁ ရက်နေ့မှာ ပုံမှန်အတိုင်း သွားလာကြနေတယ်လို့ သိရပါတယ်။