စစ်အာဏာရှင်စနစ်ဆန့်ကျင်ရေးလှုပ်ရှားမှု CDM ပြုလုပ်ထားတဲ့ အခြေခံပညာအလယ်တန်း တာဝန်ခံ ကျောင်းအုပ်ဆရာ ကိုဝေရာစိုးနဲ့ တနင်္သာရီဂျာနယ်ရဲ့ ပင်တိုင်ဆောင်းပါးရှင်တဦးဖြစ်သူ ကိုအောင်လွင် (ကံပေါက်သား) တို့ကို ဒီဇင်ဘာ ၂၉ ရက်မှာ ထားဝယ်မြို့နယ်တရားရုံးကနေ ထောင်ဒဏ် ၅ နှစ်စီ ချမှတ်လိုက်တယ်လို့ နီးစပ်သူတွေက ပြောပါတယ်။
အသက် ၃၅ နှစ်ဝန်းကျင်ရှိကြတဲ့ ကိုဝေရာစိုးနဲ့ ကိုအောင်လွင်တို့ ၂ ဦးစလုံးဟာ အကြမ်းဖက်မှုတိုက်ဖျက်ရေး ဥပဒေပုဒ်မ ၅၂(က) နဲ့ အမှုတတွဲတည်း တရားစွဲဆိုခံခဲ့ရပြီး ဘာလို့ အဲဒီပုဒ်မနဲ့ တရားစွဲဆိုခံခဲ့ရလဲ ဆိုတာကိုတော့ မသိရပါဘူး။
ကိုအောင်လွင်ရဲ့ မိတ်ဆွေတဦးက “တရားသူကြီးကတော့ သူ့ယူဆချက်နဲ့ ချတယ်လို့ပြောတယ်။ မကျေနပ်ရင် ခရိုင်တရားရုံး၊ တိုင်းတရားရုံးတွေဆီ အယူခံတက်ခွင့်ရှိတယ်တဲ့။ အယူခံတက် မတက်တော့ သူ့မိသားစုဝင်တွေ တိုင်ပင်လိမ့်မယ်” လို့ ဒီဗွီဘီကို ပြောပါတယ်။
ထားဝယ်ခရိုင် ရေဖြူမြို့နယ် ကံပေါက်ဒေသဇာတိဖြစ်တဲ့ ကိုအောင်လွင်ဟာ ပြီးခဲ့တဲ့ ဧပြီ ၇ ရက်က ထားဝယ်မြို့အဝင် ကမြောကင်းတံတားစစ်ဆေးရေးဂိတ်မှာ တခြားယာဥ်မောင်းတဦးနဲ့အတူ ကားတစီးပေါ်မှာ ဖမ်းဆီးခံခဲ့ရပြီး ယာဥ်မောင်းဖြစ်သူ ကိုသူရလွင်ကတော့ ဒီနေ့ရုံးချိန်းမှာ အမှုကနေ ကွင်းလုံးကျွတ် လွတ်မြောက်ခဲ့တယ်လို့ သိရပါတယ်။
လောင်းလုံးမြို့နယ် ပညစ်ကျေးရွာ အခြေခံပညာအလယ်တန်းကျောင်း တာဝန်ခံကျောင်းအုပ်ဖြစ်သူ ကိုဝေရာစိုးကတော့ ကိုအောင်လွင်အဖမ်းခံရပြီး နောက်တရက်မှာ ထားဝယ်မြို့ နေအိမ်တအိမ်မှာ ဖမ်းဆီးခံခဲ့ရတာပါ။
အဖမ်းခံရပြီး ထားဝယ်အကျဥ်းထောင်မှာ ထိန်းသိမ်းခံခဲ့ရတဲ့ ကိုအောင်လွင်နဲ့ ကိုဝေရာစိုးတို့ ၂ ဦးဟာ ၉ လလောက်အကြာမှာ အခုလို အမိန့်ချမှတ်ခံခဲ့ရတာဖြစ်ပြီး လက်ရှိမှာလည်း ထားဝယ်အကျဥ်းထောင်မှာပဲ အကျဥ်းကျခံနေရပါတယ်။
ထားဝယ်မြို့မှာ ငွေလွှဲလုပ်ငန်းလုပ်ကိုင်ပြီး ကိုအောင်လွင်တို့နဲ့အတူ အမှုတတွဲတည်းပါတဲ့ တခြားအမျိုးသားတဦးနဲ့ အမျိုးသမီးတဦးကတော့ တရားမဝင်ငွေကြေးလဲလှယ်မှုနဲ့ ထောင်ဒဏ် ၂ နှစ်စီ ချမှတ်ခံခဲ့ရပါတယ်။
