ရန်ကုန်မြို့၊ လသာမြို့နယ်၊ ၁ ရပ်ကွက်၊ ကမ်းနားလမ်းနဲ့ လမ်းမတော်လမ်းထောင့်ရှိ ဧရာဝတီဘဏ်ခွဲ ၃၇ မှာ ဒီဇင်ဘာ ၁၉ ရက် ဒီနေ့မနက်ပိုင်းက လုယက်မှုဖြစ်ပြီး ကျပ် သိန်း ၁၀၀ နီးပါး ပါသွားတယ်လို့ ရပ်ကွက်နေသူတွေဆီက သိရပါတယ်။
ဒီနေ့မနက် ၁၀ နာရီဝန်းကျင်က ဧရာဝတီဘဏ်ခွဲ ၃၇ ကို အမည်မသိ အမျိုးသားတယောက် ရောက်လာပြီး ဓားမြောင်တချောင်းနဲ့ ခြိမ်းခြောက်ကာ ငွေကောင်တာမှ သိန်း ၁၀၀ နီးပါး ယူသွားတယ်လို့ ရပ်ကွက်နေသူတဦးက ဒီဗွီဘီကို ပြောပါတယ်။
“ဘယ်သူမှမသိဘူး၊ ၉ နာရီ ၄၀ မှာ ဖြစ်တာဆိုတော့ ရုံးစဖွင့်တဲ့အချိန် ကောင်မလေးတွေနဲ့ လုံခြုံရေးတယောက်ပဲရှိတာ၊ အဲ့ဒီအချိန် ဓားနဲ့ခြိမ်းခြောက်ပြီး ယူသွားတာဖြစ်မယ်။ အဲ့ဒီနားကသူတွေတောင် မသိဘူး၊ ဖြစ်ပြီးမှသိတာ၊ စစ်သားတွေရောက်လာမှ သိတာ။”
လုယက်သူအမျိုးသားဟာ ဘဏ်မန်နေဂျာ အပါအဝင် ဝန်ထမ်းတွေကို ဓားနဲ့ခြိမ်းခြောက်ကာ ငွေကောင်တာက ငွေတွေယူသွားတာဖြစ်တယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။
“ငွေကတော့ သိန်း ၁၀၀ နီးပါး ပါသွားတယ်။ စစ်တပ်က နောက်မှရောက်လာတာ၊ မမိဘူး။”
လုယက်မှုဖြစ်ပြီးနောက် စစ်ကောင်စီတပ်နဲ့ ရဲတွေက မဟာဗန္ဓုလလမ်းကနေ ကမ်းနားထိ ပိတ်ဆို့စစ်ဆေးခဲ့တယ်လို့ ရပ်ကွက်နေသူတွေဆီက သိရပါတယ်။
ပြီးခဲ့တဲ့လတွေကလည်း ရန်ကုန်က မြို့နယ်တချို့မှာ လုယက်မှုတွေဖြစ်ပြီး သေဆုံးသူနဲ့ ထိခိုက်ဒဏ်ရာရသူတွေ ရှိခဲ့ပါတယ်။
