စစ်ကိုင်းတိုင်း၊ ဘုတလင်မြို့နယ် မြိုပေါ်ရွာက ဒေသခံပြည်သူနေအိမ် ၅ လုံးအား မီးရှို့ခဲ့တဲ့ စစ်ကောင်စီတပ် ဒီနေ့မနက် မိုင်းဆွဲခံရတယ်လို့ ဒေသခံတွေက ပြောပါတယ်။
အလုံမြို့နယ် နမခတပ်အတွင်းကနေ ဘုတလင်မြို့နယ်ဘက် စစ်ကြောင်းထိုးလာတဲ့ စစ်ကောင်စီတပ် မိုင်းဆွဲခံရတာလို့ ဒေသခံတဦးက ပြောပါတယ်။
“သူတိုက မနေ့က မနက်ခင်းပိုင်းက စစ်ကြောင်းထိုးပြီး မိုင်းဆွဲခံရတယ်။ အဲလိုမိုင်းဆွဲခံရပြီး ဒဏ်ရာရတဲ့သူတွေကို ကျနော်တို့မြိုပေါ်ရွာအတွင်း စခန်းချဆေးကူသမှုတွေ လုပ်တယ်ဗျ။ ဒီ နေ့မနက်ကြတော့ ရွာကို မနက်ခင်း ၈ နာရီလောက် ရွာကိုမီးရှို့ပြီး ဇီးတောရွာဘက် ထပ်ပြီး စစ်ကြောင်းထိုးတယ်။ အဲလိုထိုးရင်း ထပ်ပြီးမိုင်းဆွဲခံရတယ်။ မိုင်းမိတာက ဇီးတောရွာအနီးမှာ ထပ်မိုင်းမိတာ။ အထိခိုက်ကတော့ အသေအချာ မသိရသေးဘူး။ အခုဇီးတောရွာ ဘုန်းကြီးကျောင်းမှာ စခန်းချနေတယ်။ ဒဏ်ရာရတဲ့စစ်သားတွေကို အလုံ-မုံရွာလမ်းကနေ နမခစစ်ဆေးရုံကို ပိုနေတယ်။”
ဒီဇင်ဘာ ၉ ရက်နေ့က မြို့ပေါ်ရွာအနီး မိုင်း ၂ လုံးခွဲတိုက်ခိုက်တာက ဘုတလင် Chintwin Brother ပြည်သူ့ကာကွယ်ရေးအဖွဲ့က ပြုလုပ်ခဲ့ပြီး စစ်သား ၅ ဦးသေဆုံးကာ ၁၅ ဦးဒဏ်ရာရရှိသွားတယ်လို့ ထုတ်ပြန်ထားပါတယ်။
စစ်ကောင်စီတပ်ဖွဲ့ ထိခိုက်ကျဆုံးစာရင်းကိုတော့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။
စစ်ကောင်စီတပ်က ဇီးတောရွာထဲကို အင်အား ၁၃၀ ကျော်နဲ့ ဝင်ရောက်လာတာကြောင့် ဒေသခံတွေ ထွက်ပြေးနေကြရတယ်လို့ သိရပါတယ်။
