တနင်္သာရီတိုင်း တနင်္သာရီမြို့နယ် ပြည်ထောင်စုလမ်းမပေါ်မှာ မြိတ်ကနေ ဘုတ်ပြင်းဘက် စစ်ကူ တက်လာတဲ့ စစ်ကောင်စီယာဉ်တန်းကို KNLA-TCSJF တပ်ဖွဲ့က ဒီဇင်ဘာ ၂ ရက် ညနေမှာ စောင့်ကြိုတိုက်ခိုက်ခဲ့တယ်လို့ KNLA-TCSJFအဖွဲဝင် တဦးက ပြောပါတယ်။
ရေဖြူရွာအလွန် ထုံခါရွာသင်္ချိုင်းနား (ဒေသအခေါ် မပိုက်ချောင်) ပြည်ထောင်စုလမ်းပေါ်မှာ တိုက်ခိုက်ခဲ့လို့ စစ်ကောင်စီတပ်သား ၁၀ ယောက်ထက်မနည်း ထိခိုက်ဒဏ်ရာရခဲ့ပြီး ဒေသခံပြည်သူ့ကာကွယ်ရေးအဖွဲတွေက ထိခိုက်မှု မရှိဘဲ ဆုတ်ခွာနိုင်ခဲ့တယ်လို့ ဆိုပါတယ်။
“စစ်ကောင်စီယာဉ်တန်းထဲက ပထမ ၃ စီးကို တိုက်ခိုက်တာ။ ကျန်နှစ်စီး ပြန်လှည့်သွားတယ်။ စစ်ကောင်စီဘက်ကတော့ အထိအခိုက်အကျအဆုံးများတယ်။ ကျနော်တို့ဘက်က အကျအရှုံး မရှိ ဆုတ်ခွာလာနိုင်တယ်။ ”
စစ်ကား ၅ အနက် ၃ စီး ပစ်ခတ်ခံရပြီး ချောင်းလမုဘုန်းကြီးကျောင်းဘက်ကို မောင်းသွားကာ ၂ စီးက နောက်ပြန်လှည့်ပြီး ရေဖြူဘက်ကို ပြန်သွားတယ်လို ဆိုပါတယ်။
တနင်္သာရီဒေသတွင်း ပြည်သူ့ကာကွယ်ရေးတပ်ဖွဲတွေအနေနဲ့လည်း ဒေသတွင်းတိုက်ပွဲတွေ ပြင်းထန်လာနိုင်လို့ ပြည်ထောင်စုလမ်းမကြီးတလျှောက်မှာ ရွာတွေအနေနဲ့ စစ်ကြောင်း ဝင်လာရင် ကျေးရွာထဲမှာ မနေဘဲ ဘေးလွတ်ရာနေဖို့ သတိပေးထားပါတယ်။
