စစ်ကိုင်းတိုင်း၊ ခန္တီးမြို့မှာ စစ်ကောင်စီလက်အောက်ခံ ခန္တီးခရိုင်တရားရုံးက မဖူးဖူးဆိုသူ အမျိုးသမီးကို PDF ထောက်ပံ့တယ်လို့စွပ်စွဲပြီး နိုဝင်ဘာ ၂၂ ရက်နေ့က ထောင်ဒဏ် ၁၀ နှစ် အမိန့်ချလိုက်တယ်လို့ မိသားစုဝင်တဦးက ပြောပါတယ်။

“ဒီနေ့ညနေ ၃ နာရီက စစ်ကောင်စီလက်အောက်ခံ ခန္တီးခရိုင်တရားရုံးက မဖူးဖူးကို ထောင်ဒဏ် ၁၀ နှစ် အမိန့်ချတယ်။ အခုလို အမိန့်ချတာ များတယ်။ မတရားဘူးလို့ ခံစားရတယ်။ မဖူးဖူးကို PDF တွေ ထောက်ပံ့တယ်ဆိုပြီး ထောင်ဒဏ် ၁၀ နှစ် ချတာ။ သူက ဈေးရောင်းတာဆိုတော့ ငွေတွေလည်းရှိတယ်။ ဒါကို PDF တွေ ထောက်ပံ့တယ်ဆိုပြီး မတရားပုဒ်မတပ်ပြီး ထောင်ချတယ်။”

မဖူးဖူးကို စစ်ကောင်စီတပ်တွေက ပြီးခဲ့တဲ့ ဖေဖော်ဝါရီ ၂၂ ရက်မှာ ခန္တီးမြို့ပေါ် မိုင်းရပ်ကွက် နေအိမ်မှာ ဖမ်းဆီးပြီး အကြမ်းဖက်တိုက်ဖျက်ရေးဥပဒေ ပုဒ်မ ၅၀(ည) နဲ့ တရားစွဲတာ ဖြစ်ပါတယ်။