ကရင်အမျိုးသားအစည်းအရုံး (ကေအန်ယူ)ရဲ့ သတ္တုတွင်းဖြစ်တဲ့ အမှတ် ၁ မိုင်းတွင်းနဲ့ အမှတ် ၂ မိုင်းတွင်းကို စစ်ကောင်စီတပ်က နိုဝင်ဘာ ၂၁ ရက် ည ၁၂ နာရီလောက်မှာ လေကြောင်းကနေ လာရောက်ပစ်ခတ်တိုက်ခိုက်လို့ အဆောက်အဦတချို့ ပျက်စီးသွားတယ်လို့ ကေအန်ယူ ဒူးပလာယာခရိုင်က ထုတ်ပြန်ပါတယ်။
အခုဖြစ်စဥ်မှာ လူထိခိုက်သေဆုံးတာတွေ ရှိ၊ မရှိကိုတော့ ဒူးပလာယာခရိုင်က ထုတ်ဖော်ပြောဆိုတာ မရှိပါဘူး။
ပြီးခဲ့တဲ့ရက်ကလည်း ဘုရားသုံးဆူနယ်စပ်မြို့နဲ့ ၁၈ မိုင်အကွာအဝေးမှာရှိတဲ့ သပြုခဲသတ္တုမိုင်း အမှတ် ၆ လုပ်ကွက်စခန်းကို စစ်ကောင်စီတပ် ဂျက်တိုက်လေယာဥ်က ဒုံးကျည်နဲ့ ပစ်ခတ်ခဲ့ရာ မိုင်းစခန်းတခုလုံး ပေါက်ကွဲသွားပြီး တရုတ်နိုင်ငံသား ၃ ဦး ပွဲချင်းပြီး သေဆုံးကာ ၈ ဦး စိုးရိမ်ဒဏ်ရာ အပြင်းအထန် ရရှိခဲ့ပါတယ်။
စစ်ကောင်စီတပ်ဘက်က ကေအန်ယူ တပ်မဟာ ၆ နယ်မြေအတွင်း မြေပြင်မှာ စစ်ရေးအသာစီး မရတာနဲ့အမျှ လေကြောင်းကနေ ပိုမိုတိုက်ခိုက်လာနေတာ ဖြစ်ပါတယ်။
