ဧရာဝတီတိုင်း၊ ပုသိမ်မြို့၊ အမှတ် ၄ ရပ်ကွက်၊ ကမ်းနားလမ်းမှာပြုလုပ်တဲ့ တန်ဆောင်မုန်းလပြည့်နေ့ မီးမျှောပွဲမှာ ဗုံးပေါက်ကွဲခဲ့တယ်လို့ သိရပါတယ်။

စစ်ကောင်စီခန့် ဝန်ကြီးချုပ် ဦးတင်မောင်ဝင်း တက်ရောက်ဖွင့်လှစ်ပြီး ၁၀ မိနစ်အကြာမှာ ဗုံးပေါက်ကွဲခဲ့ကာ ဒေသခံပြည်သူတွေ ထွက်ပြေးတဲ့အထိ ဖြစ်ခဲ့တာလို့ ဒေသခံတွေက ပြောပါတယ်။

ဒေသခံတယောက်က “၆ နာရီ ၁၀ မိနစ်လောက်မှာဖြစ်တာ၊ အကုန်ပြေးတာပေါ့၊ ခံယူချက်မရှိတဲ့ကောင်တွေ၊ ကျနော်တို့က ထိုင်ကြည့်နေတာ၊ လုံခြုံရေးက တအားတင်းကျပ်ထားတာ၊ အဲ့ကြားက ရအောင်လုပ်သွားတာ လေးစားတယ်” လို့ ပြောပါတယ်။

ဗုံးပေါက်ကွဲတဲ့နေရာဟာ စစ်ကောင်စီခန့်ဝန်ကြီးချုပ် တက်ရောက်တဲ့နေရာနား မဟုတ်ပေမဲ့ ပြည်သူတွေက ထွက်ပြေးတာမျိုးရှိခဲ့ပြီး ထိခိုက်တာတော့ မရှိခဲ့ဘူးလို့ ဆိုပါတယ်။

ပုသိမ်မြို့မှာ နိုဝင်ဘာ ၅ ရက်က ရုံးပေါင်းစုံမှာရှိတဲ့ စသုံးလုံးရုံး ဗုံးပေါက်ကွဲမှု ဖြစ်ပွားခဲ့သေးတယ်လို့ ဒေသခံတွေက ပြောပါတယ်။

ဆီမီးမျှောပွဲကို အရင် ကြံ့ခိုင်ရေးအစိုးရလက်ထက်က ၃ နှစ်ကြာ ကျင်းပပြုလုပ်ခဲ့ပြီး NLD အစိုးရလက်ထက်မှာ တိုင်းအစိုးရရဲ့ အသုံးစရိတ် လျှော့ချတဲ့အနေနဲ့ ဆီမီးမျှောပွဲ ရပ်နားထားခဲ့ပြီး အာဏာသိမ်းစစ်ကောင်စီလက်ထက်မှာ ပြန်လည်ကျင်းပတာဖြစ်တယ်လို့ ဒေသခံတွေက ပြောပါတယ်။