စစ်ကိုင်းတိုင်း၊ မြင်းမူမြို့နယ်အတွင်း ခြေလျင်စစ်ကြောင်းထိုးလာတဲ့ စစ်ကောင်စီတပ်ဟာ နိုဝင်ဘာ ၂ ရက် မနက် ၉ နာရီ မိနစ် ၄၀ လောက်က ဝမ်းပြည့်ကျေးရွာနဲ့ အလ္လကပ္ပကျေးရွာ ကြားမှာ မိုင်းဆွဲတိုက်ခိုက်ခံခဲ့ရပါတယ်။

ဒီတိုက်ခိုက်မှုကို People's Army To Fight Dictatorship (PAFD) တပ်ခွဲ DK PDF (MMU)၊ People's Knight Defense Force Myinmu (PKDF-MMU)၊ TAUNGTHA People Defense Force (TTAPDF)၊ D.B.B.F-MMU မဟာမိတ်အဖွဲ့တွေက မိုင်းဘီလူး ၃ လုံးနဲ့ မိုင်းဆွဲတိုက်ခိုက်ခဲ့တာလို့ သိရပါတယ်။

စစ်ကောင်စီတပ်ဖွဲ့ဝင်တွေဟာ နိုဝင်ဘာ ၁ ရက် ည ၈ နာရီလောက်က စစ်ကိုင်း တပ်မ ၃၃ မှ အုန်းတောအမြောက်တပ်တွင်းကို စစ်ကား ၂ စီးနဲ့ ဝင်ရောက်ခဲ့ပြီး အဲဒီကတဆင့် ည ၁၂ နာရီလောက်မှာ မြင်းမူမြို့ အထက ၁ ကျောင်းတွင်းကို ရောက်ရှိလာတာဖြစ်တယ်လို့ အာဏာရှင်စနစ်တိုက်ဖျက်ရေး ပြည်သူ့တပ်ဖွဲ့ (PAFD) က ထုတ်ပြန်ထားပါတယ်။

နိုဝင်ဘာ ၂ ရက် မနက် ၆ နာရီမှာတော့ စစ်ကောင်စီတပ်ဖွဲ့ဝင် အင်အား ၆၀ လောက်ဟာ မြင်းမူမြို့ မြို့ရှောင်ရထားသံလမ်းကနေ ခြေလျင်ဆင်းပြီး အနီးအနား တောတွေကနေစကာ စစ်ကြောင်းထိုးလာခဲ့တာလို့ သိရပါတယ်။

မိုင်းဆွဲတိုက်ခိုက်ခံရတဲ့အတွက် စစ်ကောင်စီတပ်ဖွဲ့ဝင် ၅ ယောက်သေပြီး ၁ ယောက် ထိခိုက်ဒဏ်ရာရရှိခဲ့ရာ ရုပ်အလောင်းတွေ မုံရွာကို သယ်ဆောင်သွားတယ်လို့ ထုတ်ပြန်ချက်မှာ ဖော်ပြပါတယ်။

ဒါ့အပြင် စစ်ကောင်စီတပ်ဟာ ပြည်သူတွေကို ဓားစာခံအဖြစ်ဖမ်းပြီး အလ္လကပ္ပရွာတွင်းကို ဆက်သွားတယ်လို့ သိရပါတယ်။

အလားတူ မုံရွာ-မန္တလေးလမ်းပိုင်းရှိ မုံရွာ-ချောင်းဦးလမ်းပိုင်းမှာ မိုင်းရှင်းဖို့လာတဲ့ စစ်ကောင်စီယာဉ်တစီးကို မိုင်းဆွဲတိုက်ခိုက်ခဲ့တယ်‌လို့ Monywa Peregrin အဖွဲ့က နိုဝင်ဘာ ၂ ရက်နေ့မှာ ထုတ်‌ပြန်‌ပါတယ်‌။

နိုဝင်ဘာ ၂ ရက်‌‌ မနက်‌ပိုင်းက မုံရွာ-ချောင်းဦးလမ်းပိုင်းမှာ မိုင်းရှင်းဖို့လာတဲ့ စစ်ကောင်စီယာဉ်ကို စွမ်းရည်ထက်ဆီဆိုင်အနီးမှာ မိုင်းဆွဲတိုက်ခိုက်ခဲ့ပြီး စစ်‌‌ကောင်‌စီယာဉ်ထိမှန်‌ကာ စစ်ကောင်စီတပ်ဖွဲ့ဝင် ၃ ယောက်လောက် သေနိုင်ပြီး ၇ ယောက်‌ေလာက် ထိခိုက်ဒဏ်ရာ ရရှိနိုင်ကြောင်း ထုတ်ပြန်ချက်မှာ ဖော်ပြပါတယ်။

Monywa Peregrine People's Defence Force (အမဲလိုက်သိန်းငှက် ပြည်သူ့ကာကွယ်ရေးတပ်ဖွဲ့-မုံရွာ) နဲ့အတူ ဒေါင်းညီနောင် ပြည်သူ့ကာကွယ်ရေးတပ်ဖွဲ့၊ မုံရွာခရိုင်တပ်ရင်း-၁ MPDF၊ လင်းယုန်ပြည်သူ့ကာကွယ်ရေးတပ်၊ ဇာမဏီ ပြည်သူ့ကာကွယ်ရေးတပ်၊ Generation Z People Defence Force တို့ ပူးပေါင်းဆောင်ရွက်‌ခဲ့ပါတယ်‌။

ဒီနေ့မနက်ပိုင်း မုံရွာ-မန္တလေးလမ်းပေါ်၊ မုံရွာ-ချောင်းဦးလမ်းပိုင်းကို ပြည်သူတွေ ဖြတ်သန်းသွားလာတာ မလုပ်ဖို့ ဒေသကာကွယ်ရေးအဖွဲ့‌တွေက ထုတ်‌ပြန်‌ထားပါတယ်။