ကရင်နီ (ကယား) ပြည်နယ် လွိုင်ကော်မြို့နယ် ဝါရီကောခူးကျေးရွာအတွင်း ဒီကနေ့ မနက် ၄ နာရီလောက်က လက်နက်ကြီး ကျရောက်ပေါက်ကွဲမှုကြောင့် ဒေသခံ ၃ ဦး ပြင်းထန်စွာ ဒဏ်ရာရရှိခဲ့ပါတယ်။
ဒဏ်ရာရရှိသူတွေကတော့ အသက် ၄၅ နှစ်အရွယ်အမျိုးသမီးတဦး၊ အသက် ၄၆ နှစ်အရွယ် အမျိုးသားတဦးနဲ့ ၂၅ နှစ်အရွယ်အမျိုးသားတဦးတို့ ဖြစ်ပါတယ်။
ဒဏ်ရာရရှိသူတွေကို ရွှေလွှိုင်ကော်ပရဟိတအသင်းက လွိုင်ကော်ဆေးရုံကြီကို ပို့ဆောင်ပေးခဲ့ကြောင်း အသင်းရဲ့ တာဝန်ရှိသူက ပြောပါတယ်။
လွိုင်ကော်မြို့နယ်မှာ အောက်တိုဘာ ၂၃ ရက် ည ၉ နာရီလောက်လည်း စစ်ကောင်စီတပ်က လက်နက်ကြီးနဲ့ ပစ်ခတ်လို့ စစ်ရှောင်မိသားစုတစုရဲ့နေရာမှာ ကျရောက်ပြီး ဖခင်ဖြစ်သူ သေဆုံးသွားသလို နောက်နေ့မှာလည်း မိခင်ဖြစ်သူ သေဆုံးသွားတဲ့အတွက် အသက် ၆ လသားအရွယ်နဲ့ ၈ နှစ်သားအရွယ် ကလေးနှစ်ယောက်ကတော့ ပေါင်မှာ ထိခိုက်ဒဏ်ရာနဲ့ မိဘမဲ့ဖြစ်ခဲ့ရပါတယ်။
ကရင်နီပြည်နယ်မှာ စစ်ကောင်စီဘက်က နေ့စဉ်နဲ့အမျှ လက်နက်ကြီးတွေနဲ့ ပစ်ခတ်တိုက်ခိုက်မှုကြောင့် စစ်ရှောင်နဲ့ဒေသခံ ပြည်သူတွေနေ့စဉ်လိုလို ထိခိုက်သေဆုံးမှု ဖြစ်ပွားနေရပါတယ်။
