ကရင်နီ(ကယား)ပြည်နယ်၊ လွိုင်ကော်မြို့နယ်မှာ အောက်တိုဘာ ၂၃ ရက် ည ၉ နာရီလောက်က စစ်ကောင်စီတပ်က လက်နက်ကြီးနဲ့ ပစ်ခတ်လို့ စစ်ရှောင်မိသားစုတစုရဲ့နေရာမှာ ကျရောက်ပြီး ဖခင်ဖြစ်သူ ပွဲချင်းပြီး သေဆုံးခဲ့ပါတယ်။
မိခင်ဖြစ်သူမှာလည်း ဦးခေါင်းမှာ ပြင်းထန်စွာ ဒဏ်ရာရရှိခဲ့ပြီး ၆ လသားအရွယ်နဲ့ ၈ နှစ်သား အရွယ် ကလေးနှစ်ယောက်ကတော့ ပေါင်မှာ ထိခိုက်ဒဏ်ရာရရှိခဲ့ပါတယ်။
ဦးခေါင်းမှာ ဒဏ်ရာပြင်းထန်စွာရရှိခဲ့တဲ့ မိခင်ဖြစ်သူဟာလည်း အောက်တိုဘာ ၂၄ ရက် မနေ့ ညနေ ၅ နာရီခန့်မှာ ရရှိထားတဲ့ ဒဏ်ရာနဲ့ ကွယ်လွန်သွားခဲ့ပါတယ်။
မိသားစုတစkတည်းက မိခင်ရော ဖခင်ပါ ဆုံးပါးသွားတဲ့အတွက် ၆ လသားအရွယ်နဲ့ ၈ နှစ်အရွယ်သား ကလေးငယ် နှစ်ယောက်သာ ကျန်ရစ်ခဲ့ပါတယ်။
ကရင်နီ(ကယား)ပြည်နယ်မှာ နေ့စဉ်နဲ့အမျှ တိုက်ပွဲတွေ ဖြစ်ပွားနေပြီး စစ်ကောင်စီဘက်က ကျေးရွာတွေဘက်ကို လက်နက်ကြီးတွေနဲ့ ပစ်ခတ်နေသလို လေကြောင်းကနေ ဗုံးကြဲတိုက်ခိုက်နေပါတယ်။
