ရေးမြို့နယ် ဇီးဖြူသောင်ကျေးရွာ ရဲကင်းစခန်း တိုက်ခိုက်ခံရ
DVB
·
October 18, 2022
မွန်ပြည်နယ် ရေးမြို့နယ် ဇီးဖြူသောင်ကျေးရွာ ရဲကင်းစခန်းကို အောက်တိုဘာ ၁၇ ရက်နေ့ ညနေမှာ အမည်မသိ သေနက်သမားတွေ ဝင်ရောက်ပစ်ခတ်ခဲ့ကြတယ်လို့ ဒေသခံတွေက ပြောပါတယ်။
“ပစ်ခတ်တာပဲ ကြားတယ်၊ ဘယ်သူတွေ ဝင်ပစ်တာလဲမသိဘူး။ ရဲ ၃ ဦး ထိခိုက်ကျဆုံးတာပဲ ကြားရတယ်။ ပစ်တဲ့အဖွဲ့က ထိခိုက်တာ၊ လူတွေ ထိခိုက်တာ မကြားရသေးဘူး”လို့ ဒေသခံတဦးက ပြောပါတယ်။
ပစ်ခတ်မှုအပြီးမှာ ဇီးဖြူသောင်ကျေးရွာ အဝင်အထွက်လမ်း အားလုံးကို စစ်ကောင်စီတပ်ဘက်မှ ပိတ်ဆို့ထားပြီး လုံခြုံရေးပါ တင်းကျပ်ထားတယ်လို့ ဆိုပါတယ်။
အခုဖြစ်စဉ်မှာ ရဲစခန်းကို ပထမဆုံးအကြိမ် ဝင်ရောက် ပစ်ခတ်တာဖြစ်ပြီး ဘယ်အဖွဲ့အစည်းက လုပ်ဆောင်ခဲ့တယ်ဆိုတာ မသိရသေးလို သတင်းထုတ်ပြန်တာလည်း မရှိသေးပါဘူး။
ဖြစ်စဉ်နဲ့ပတ်သက်ပြီး စစ်ကောင်စီလက်အောက်ခံ ရဲတပ်ဖွဲ့ဝင်တွေကို ထပ်မံ အတည်ပြုချက်ရယူဖို့ ဆက်သွယ်မေးမြန်းလို့ မရသေးပါဘူး။
