မုံရွာမြို့ အလုံ မင်းဒေါင့်ဆိပ်ကမ်းကနေ ချင်းတွင်းမြစ်ကြောင်းအတိုင်း ထွက်ခွာလာတဲ့ စစ်ကောင်စီတပ်ဖွဲ့ ရေယာဉ်တန်းကို အောက်တိုဘာ ၁၅ ရက် မနက် ၁၁ နာရီက ဒေသ ကာကွယ်ရေးပူးပေါင်းအဖွဲ့မှ မိုင်းဆွဲတိုက်ခိုက်ခဲ့တယ်လို့ သိရပါတယ်။
တိုက်ခိုက်ခံရတဲ့ ရေယာဉ်တန်းမှာ စစ်သင်္ဘော ၂ စီးနဲ့ ပလက်ခွံရေယာဉ် ၁ စီးတို့ပါဝင်ပြီး လက်နက် အပြည့်စုံတပ်ဆင်ကာ စစ်ကောင်စီတပ်ဖွဲ့ဝင်အင်အား အများပြားလိုက်ပါလာတယ်လို့ ဒေသကာကွယ်ရေးအဖွဲ့က Farmers Revolution Force ( မုံရွာခရိုင် ) အဖွဲ့ တာဝန်ရှိသူက ပြောပါတယ်။
"မင်းဒေါင့်ဆိပ်ကမ်းကနေ လော်စပီကာနဲ့ မိုက်တယ်ဆိုတဲ့ PDF တွေ ထွက်ခဲ့ဆိုပြီး ချင်းတွင်း မြစ်ကြောင်းတလျှောက်အော်ပြီး စုန်ဆင်းလာတာ။ ပြောရရင် သူတို့ဘက်က အင်အားများတယ် ဆိုပြီး စိန်ခေါ်လာတာပေါ့ဗျာ။ သူတို့ ထွက်ခဲ့ဆိုလို့ မိုင်းနဲ့ ထွက်ပြလိုက်တာပါ။"
စစ်ကောင်စီတပ်ဖွဲ့ဝင်အင်အား အများပြားနဲ့အတူ ရှေ့ဆုံးက ထွက်ခွာလာတဲ့ ပလက်ခွံရေယာဉ်ကို နှစ်နေရာခွဲကာ မိုင်း ၅ လုံးနဲ့ ဖောက်ခွဲ တိုက်ခိုက်ခဲ့တာဖြစ်ပြီး ရေယာဉ်ပေါ်မှ လက်နက်ကြီး၊ လက်နက်ငယ်တွေနဲ့ ပြန်လည်ပစ်ခတ်ခဲ့တယ်လို့ သိရပါတယ်။
လက်ရှိမှာတော့ စစ်ကောင်စီတပ်ဖွဲ့ဘက်မှ ထိခိုက်သေဆုံးမှုအခြေနေကို စုံစမ်းနေဆဲဖြစ်ပြီး ဒေသကာကွယ်ရေးပူးပေါင်းအဖွဲ့ကတော့ တစုံတရာထိခိုက်မှုမရှိခဲ့ဘူးလို့ ဆိုပါတယ်။
အောက်တိုဘာ ၁၄ ရက် နေ့လယ်ပိုင်းကလည်း မင်းကင်းမြို့နယ်မှ မုံရွာမြို့ဘက် ချင်းတွင်းမြစ်ကြောင်း စုန်ဆင်းလာတဲ့ စစ်သင်္ဘော ၂ စီးကို ဒေသကာကွယ်ရေးပူးပေါင်း တပ်ဖွဲ့တွေက ၃ နေရာခွဲပြီး ပစ်ခတ်ခဲ့ရာမှ တိုက်ပွဲဖြစ်ပွားခဲ့ပြီး စစ်င်္ဘော ၁ စီး RPG လက်နက် ကျည် ထိမှန်ခဲ့တယ်လို့ သိရပါတယ်။
