ရခိုင်ပြည်နယ် ကျောက်တော်မြို့ ကုလားတန်မြစ်အတွင်းမှာ စက်တင်ဘာ ၉ ရက် ညနေပိုင်းက အမျိုးသမီး အလောင်းတလောင်း တွေ့ရှိခဲ့တယ်လို့ ဖြူစင်မေတ္တာပရဟိတအသင်းက သိရ ပါတယ်။
ကျောက်တော်သကြားစက်ဘက်ကနေ ကျောက်တော်မြို့ဘက်ကို မျောပါလာတဲ့ အမျိုးသမီး အလောင်းတလောင်းကို မနေ့က ပရဟိတအဖွဲ့ဝင်တွေ ဆယ်ယူပြီး ကျောက်တော်ပြည်သူ့ဆေးရုံ ရင်ခွဲရုံကို ပို့ဆောင်ပေးခဲ့တယ်လို့ ဖြူစင်မေတ္တာပရဟိတသင်းမှ ကိုညီပုက ပြောပါတယ်။
“အလောင်းက ပိုင်ရှင်မပေါ်သေးလို့ ဘယ်သူဘယ်ဝါဆိုတာကို မသိရသေးသလို ဘယ်ကလည်း ဆိုတာကို မသိရသေးဘူး။ ရေမြုပ်ထားတာ အချိန်ကြာနေပြီဖြစ်လို့ ဒဏ်ရာတွေကတော့ များတယ်။ သူ့ကိုဆယ်ပြီး ရင်ခွဲရုံကို ပို့ဆောင်ပေးလိုက်တယ်။”
ဆေးရုံက စစ်ဆေးပြီးလို့ ပိုင်ရှင် မပေါ်ရင်တော့ နာရေးကူညီမှုအသင်း အစီအစဉ်နဲ့ သင်္ဂြိုလ်မယ်လို့ ကိုညီပုက ပြောပါတယ်။
အဲဒီအမျိုးသမီး ဘာကြောင့် သေဆုံးတယ်ဆိုတာ မသိရသေးဘဲ ရခိုင်ပြည်နယ်အတွင်းမှာတော့ မြစ်ချောင်းပေါများတဲ့အတွက် မိုးကာလ ငါးရှာ၊ ဟင်းရှာသွားကြရင်း ရေနစ်သေဆုံးတဲ့သူတွေ နှစ်စဉ်ရှိတယ်လို့ ဒေသခံတွေက ပြောပါတယ်။
