စစ်ကိုင်းတိုင်း၊ တမူးမြို့၊ ဇမ္ဘူရတနာ ဘုန်းတော်ကြီးကျောင်းအနီးရှိ နေအိမ်တအိမ်ကို စက်တင်ဘာ ၄ ရက် ညဦးပိုင်းမှာ ဓားပြဝင်တိုက်တဲ့ ၅ ယောက်ကို ရပ်ကွက်လုံခြုံရေး ကင်းစောင့်နေတဲ့ ဂေါ်ရခါးလူငယ်တွေက ဖမ်းဆီးခဲ့တယ်လို့ မြို့ခံတွေထံကသိရပါတယ်။
ဓားပြအဖွဲ့မှာ အမျိုးသား ၇ ယောက်ပါဝင်ပြီး ၂ ယောက်ကတော့ ထွက်ပြေးလွတ်မြောက်သွားတယ်လို့ တမူးမြို့ခံတဦးက ပြောပါတယ်။
"ဓားပြတိုက်တာတွေ မကြာခဏဖြစ်နေတော့ ဂေါ်ရခါးလူငယ်တွေ အဖွဲ့လိုက်ကင်းစောင့် နေကြတုန်းဂေါ်ရခါးလူမျိုး နေတဲ့အိမ်ကို ဓားပြဝင်တိုက်တာ။ အဲ့ဒီမှာဝိုင်းဖမ်းကြတာ၊ ဓား ၂ ချောင်းနဲ့ သံတုတ်တစ်ခုပါတာ။ ဓားပြတွေက သေနတ်တော့မပါဘူး။”
ဖမ်းမိသူတွေကို ရဲစခန်းပို့လိုက်ပြီး ဓားပြတိုက်ခံရတဲ့ပစ္စည်းတွေလည်း ပြန်ရရှိခဲ့တယ်လို့ နီးစပ်သူတွေက ဆိုပါတယ်။
ပြီးခဲ့တဲ့ ဩဂုတ်လ ၃၀ ရက်က တမူးမြို့ ပဒေသာစားသောက်ဆိုင်အနီးရှိ အိမ်ဆိုင်ကို သေနတ်ဖောက် ဓားပြတိုက်တုန်းက ပါသွားတဲ့ ဆိုင်ကယ် ၂ စီးကိုလည်း အခုဖမ်းမိတဲ့သူတွေဆီက ပြန်တွေ့ရှိခဲ့ပါတယ်။
