ကချင်ပြည်နယ် နောင်မွန်မြို့တွင် စက်တင်ဘာ ၃ ရက်မှာ မိုးသည်းထန်စွာရွာသွန်းပြီး ရေကြီးရေလျှံမှုဖြစ်ပွားခဲ့တာကြောင့် ကဆန်ထီချောင်းကူးတံတားပျက်စီးသွားပြီး ဒေသခံတွေ သွားလာရခက်ခဲနေတယ်လို့ နောင်မွန်ဒေသခံတဦးက ပြောပါတယ်။
"မိုးအဆက်မပြတ်ရွာတာ တပတ်လောက်ရှိပါပြီ။ မနေ့ညရွာတဲ့ မိုးက ပိုသည်းတယ်။ ဒီနေ့ မနက်ပိုင်းအထိ အဆက်မပြတ်ရွာတော့ မြို့နားစီးနေတဲ့ ကဆန်ထီချောင်းရေတွေ ရပ်ကွက်ထဲထိ တက်လာတယ်။ မြေနိမ့်ပိုင်းမှာရှိတဲ့ ရပ်ကွက် ၂ တဝက်က ရေမြုပ်နေပြီ။ နောင်မွန် - နမ်ပန်ဒမ်းရွာကို ဆက်သွယ်ထားတဲ့ ကြိုးတံတားလည်း ပျက်စီးသွားတော့ သွားလာရေး တော်တော်ခက်နေပါတယ်။"
ကချင်ပြည်နယ်ဒေသမှာ ၂၄ နာရီအတွင်း ပူတာအိုမြို့၊ နောင်မွန်မြို့နယ်၊ ပန်နမ်းဒင်မြို့နယ်နဲ့ ခေါင်လန်ဖူးမြို့နယ်ဒေသတွေမှာ မိုးကြီးနိုင်တယ်လို့ မိုးလေဝသပညာရှင် Su Su San (Los Angeles, California) က သူ့ရဲ့ လူမှုကွန်ရက် စာမျက်နှာမှာ ဖော်ပြထားပါတယ်။
