စစ်ကိုင်းတိုင်း၊ ယင်းမာပင်မြို့နယ်အတွင်းရှိ ကျေးရွာတွေကို မီးရှို့ဖျက်ဆီးနေတဲ့ စစ်ကောင်စီတပ်သားတွေကို ယင်းမာပင်မြို့ အခြေစိုက် ဆရာစံ- PDF နဲ့ Golden Triangle Fore အဖွဲ့က စနိုက်ပါနဲ့ ပူးပေါင်းတိုက်ခိုက်ခဲ့ရာ ၃ ရက်အတွင်း စစ်ကောင်စီ တပ်သား ၄ ဦးသေဆုံးပြီး ၁ ဦးဏ်ရာရတယ်လို့ ဆရာစံ -PDF က ထုတ်ပြန်ပါတယ်။

ဩဂုတ် ၂၀ ရက်နေ့က ကပိုင်ကျေးရွာနဲ့ က/သီးကုန်းရွာမှ ပေါင်းဝရွာကိုပြန်ဝင်ပြီး မီးရှို့လာတဲ့ စစ်ကောင်စီတပ်သားတွေကို ကပိုင်ကျေးရွာ အပြန်လမ်းမှာ စနိုက်ပါနဲ့ ပစ်ခတ်တိုက်ခိုက်ခဲ့ပြီး စစ်ကောင်စီ တပ်သား ၂ ဦးသေဆုံးကာ ၁ ဦး ဒဏ်ရာရရှိသွားတယ်လို့ သိရပါတယ်။

အလားတူ ဩဂုတ် ၁၉ ရက်နေ့ နေ့လယ် ၂ နာရီဝန်းကျင်လောက်က ကပိုင်ကျေးရွာတောင်ဘက်ကို လက်နက်ခဲယမ်းထောက်ပို့လာမယ့် လေယာဥ်ကို လာစောင့်နေတဲ့ စစ်ကောင်စီတပ်သားတွေအား စနိုက်ပါအပါအဝင် လက်နက်ငယ်တွေနဲ့ ပစ်ခတ်ခဲ့ရာ စစ်ကောင်စီ တပ်သား ၂ ဦးသေဆုံးပြီး ညနေ ၃ နာရီလောက် အလောင်းတွေ လာကောက်သွားတယ်လို့ ဆရာစေက ပြောပါတယ်။

PDF ခေါင်းဆောင် ဆရာစံက "ကပိုင်ကျေးရွာ အနီး စနိုက်ပါနဲ့ ပြောက်ကျားတိုက်ခိုက်မှုမှာ စစ်ကောင်စီတပ်သား ၄ ဦးသေဆုံးပြီး ၁ ဦး ထိခိုက်ဒဏ်ရာရသွားပါတယ်။ ဩဂုတ် ၂၀ ရက်နေ့က စနိုက်ပါလက်ချက်နဲ့ သေဆုံးသွားတဲ့ စစ်ကောင်စီ တပ်သား ၂ ဦးကို လေယာဉ်နဲ့ သင်္ချိုင်းကုန်းကို တခါတည်းလာသယ်သွားပြီ မီးရှို့သွားတယ်။ ၁၉ ရက်နေ့က စနိုက်ပါ နဲ့ ပစ်ခတ်မှုမှာ Kar 98 နဲ့ ၆ ချက် ပစ်ခတ်ခဲ့ပြီး စစ်ကောင်စီတပ်သား ၂ ဦးလဲကျသွားတာကို မြင်ရပါတယ်” လို့ ဒီဗွီဘီကို ပြောပါတယ်။

ကပိုင်ကျေးရွာအနီး စနိုက်ပါနဲ့ ပြောက်ကျားပစ်ခတ်မှုကို စစ်ကောင်စီတပ်ဖွဲ့ဝင်တွေ ရှိတဲ့နေရာ နဲ့ ၄ ဖာလုံခန့် အကွာအဝေးကနေ တိုက်ခိုက်ခဲ့တာဖြစ်ပြီး ဆရာစံ -PDF အဖွဲ့က ဘေးကင်းစွာ ဆုတ်ခွာနိုင်ခဲ့တယ်လို့ဆိုပါတယ်။

“တခြားမဟာမိတ်အဖွဲ့မှ ခေါင်းဆောင်တွေအနေနဲ့ တိုက်ပွဲအတွင်းနေရာယူတဲ့အခါမျိုးမှာ တပည့်ရဲဘော်တွေနဲ့ ချိတ်ဆက်မှု ရှိရှိနဲ့ နေရာချပေးဖို့၊ ကင်းထောက်ပေးတတ်ဖို့ နဲ့ ပြားအုံကို တုတ်နဲ့ ထိုးတာမျိုး မဖြစ်စေဖို့ သတိထားလုပ်ဆောင်စေချင်တယ်။ ဒါမှသာ ရဲဘော်တွေရဲ့ ထိခိုက်ကျဆုံးမှု နည်းပါးမှာဖြစ်ပြီး ပြည်သူတွေရဲ့ အသက်အိုးအိမ်များလည်း ပျက်စီးမှု နည်းပါးမှာဖြစ်တယ်” လို့ ဆရာစံက အကြံပြုထားပါတယ်။