အကြမ်းဖက်စစ်ခေါင်းဆောင် မင်းအောင်လှိုင် ပြည်သူထံမှ ခိုးယူထားတဲ့ ရန်ကုန်မြို့ ၆ မိုင်ခွဲမှ Inya View နေရာကို NUG အစိုးရက ဩဂုတ် ၅ ရက်က စတင်ရောင်းချနေရာမှာ သီတင်း ၂ ပတ်အတွင်း အစုရှယ်ယာ အမေရိကန်ဒေါ်လာ ၁ ဒသမ ၇ သန်းဖိုး ပြည့်မီတော့မှာဖြစ်တယ်လို့ ထုတ်ပြန်ပါတယ်။

အကြမ်းဖက်စစ်ခေါင်းဆောင် မတရားယူထားတဲ့ ရန်ကုန်မြို့ရှိ အင်းယားလမ်းနေအိမ်ကို NUG က အမေရိကန် ဒေါ်လာ ၁၀ သန်းနဲ့ တန်ဖိုးဖြတ်ရှယ်တွေအားလုံးရောင်းချခဲ့အပြီးမှာ  အာဏာရှင် အဆုံးသတ်နိဂုံး (The End of Dictatorship-EOD) ရဲ့ ဒုတိယ အစီအစဉ်အဖြစ်  လှိုင်မြို့နယ်၊ ၆ မိုင်ခွဲမှာ တည်ရှိတဲ့  နိုင်ငံတော်ပိုင်မြေဟာ ၁ ဒသမ ၈ ဧက ကျယ်ဝန်းပြီး ကာလပေါက်ဈေးအားဖြင့် အမေရိကန်ဒေါ်လာ သန်း ၂၀ ကျော်တန်ကြေးရှိတဲ့ Inya View နေရာကို NUG က ထပ်မံ ရောင်းချနေတာပါ။

“ခြင်းကြားရှင်းမယ့် အင်းလျား (၂) စတင်တာ ၂ ပတ်ပြည့်တဲ့ ဒီနေ့ညမှာ အစုရှယ်ယာ ၁ ဒသမ ၇ သန်းဖိုး ပြည့်တော့မှာ ဖြစ်ပါတယ်။ InyaView@6.5 Mile ဟာ ဩဂုတ် ၁၈ က ကြေညာတဲ့ Spring Yangon နဲ့ သဘောသ ဘာဝ မတူတဲ့ ပရောဂျက် ဖြစ်တာမို့ သတ်မှတ်တန်ဖိုး ဒေါ်လာ ၇ သန်း ပြည့်တဲ့အထိ ဆက်လက်ရှိနေဦးမှာ ဖြစ်ပါတယ်။ တူတာ တခုကတော့ EOD ပရောဂျက်အားလုံးဟာ အာဏာရှင် အမြစ်ဖြတ်ဖို့၊ ဖက်ဆစ်ခြင်း ကြားတွေကို ရှင်းလင်းဖို့ပါပဲ။“ငုံခံမလား တုန့်ပြန်မလား” ဆိုတဲ့ မေးခွန်းကို ပြည်သူက ပြန်ဖြခဲ့ပြီးပါပြီ။ EOD, Bond, PRF, နွေဦးထီ နဲ့ သီးခြားပရောဂျက်တွေကို အင်တိုက်အားတိုက် ပါဝင်ထောက်ပို့ကြရင်း … (((( ငုံ့မခံဘူး တုန့်ပြန်မယ် ))))လို့ ကျယ်ကျယ်လောင်လောင် ဆက်ဖြေ နေကြဦးမှာပါ။” လို့  EOD project စီစဉ်သူတွေက တိုက်တွန်းထားပါတယ်။

အခုရောင်းချမှုမှာတော့ ကာလတန်ကြေးရဲ့ ၃ ပုံ ၁ ပုံ၊ အမေရိကန်ဒေါ်လာ ၇ သန်းသာ တန်ဖိုးဖြတ်ပြီး အစုရှယ်ယာ ၇၀,၀၀၀ ကို ရောင်းချသွားမှာဖြစ်ကာ ရှယ်ယာတစုကို အမေရိကန်ဒေါ်လာ ၁၀၀ သတ်မှတ် ထားတယ်လို့ ထုတ်ပြန်ထားပါတယ်။

ဒါ့အပြင် ပြီးခဲ့တဲ့ ရက်ပိုင်းတုန်းက ရှယ်ရာပေါင်း ၅၀၀ (ဒေါ်လာ ငါးသောင်းဖိုး) ကို တယောက်တည်းက ဝယ်ယူအားဖြည့်ခဲ့သလို ပြီးခဲ့တဲ့ ဩဂုတ် ၈ ရက်မှာလည်း ရှစ်လေးလုံးအရေးတော်ပုံအထိမ်းအမှတ်အနေနဲ့ ၈၈ တုန်းက အမြစ်မပြတ်ခဲ့လို့ ၂၀၂၁ မှာ တခါ ခေါင်းထောင်လာတဲ့ အာဏာရှင်စနစ်ကို၊ သူတို့ခေတ်မှာ အမြစ်ဖြတ်မယ် ဆိုတဲ့ စိတ်ဓာတ်နဲ့ စင်ကာပူနိုင်ငံကနေ 8888 အမည်နဲ့ ရှယ်ယာ ၈၈ စောင် ဝယ်ယူသူ တဦးလည်း ပေါ်ထွက်လာခဲ့တယ်လို့ EOD က ဆိုပါတယ်။

ဒီရောင်းချမှုကို အမျိုးသားညီညွတ်ရေးအစိုးရရဲ့ ၂၀၂၂ ခုနှစ်၊ ဖေဖော်ဝါရီ ၂၄ ရက်စွဲနဲ့ ထုတ်ပြန်ထားတဲ့ “အကြမ်းဖက်စစ်ကောင်စီက သိမ်းယူထားသော တပ်ပိုင်မြေဆိုင်ရာ အခြေခံမူများ” အပိုဒ် ၄ နဲ့ အပိုဒ် ၅ အရ စီမံဆောင်ရွက်တာဖြစ်ပြီး EOD ရဲ့ ပထမ အစီအစဉ် “၁၄ အင်းလျား” ကို ရောင်းချပေးခဲ့တဲ့ ကမ္ဘာ့နိုင်ငံ အသီးသီးက ကိုယ်စားလှယ်တွေဆီ ချိတ်ဆက်ဝယ်ယူနိုင်မှာ ဖြစ်ပါတယ်။

ဒါ့အပြင် The End of Dictatorship-EOD အနေနဲ့ အာဏာသိမ်းစစ်ခေါင်းဆောင် မင်းအောင်လှိုင် မတရား ရယူသိမ်းပိုက်ထားတဲ့ တခြားသော အိမ်နဲ့ အဆောက်အအုံတွေ၊ စစ်ကောင်စီခေါင်းဆောင်တွေ မတရား ပိုင်ဆိုင်ထားတဲ့ အိမ်ခြံမြေတွေကို တခုပြီးတခု ကြိုပွိုင့်နဲ့ ရောင်းချပြီး တော်လှန်ရေးအတွက် အရေးတကြီး လိုအပ်နေတဲ့ ဘဏ္ဍာရန်ပုံငွေတွေကိုလည်း ဆက်လက်ရှာဖွေသွားမယ်လို့ ပြောထားပါတယ်။