ဧရာဝတီတိုင်း၊ ပုသိမ်မြို့နယ်၊ ရွှေသောင်ယံကမ်းခြေမှာ ဇူလိုင် ၂၃ ရက်က ရိုဟင်ဂျာ ၄၈ ဦးကို စစ်ကောင်စီတပ်သားတွေက ဖမ်းဆီးခဲ့တယ်လို့ ဒေသခံတွေထံက သိရပါတယ်။
ရခိုင်ပြည်နယ်မြောက်ပိုင်းကနေတဆင့် ငါးဖမ်းစက်လှေနဲ့လိုက်လာတဲ့ ရိုဟင်ဂျာတွေကို စစ်ကောင်စီရဲ့ ရေတပ်က ကင်းလှည့်ရင်း ပင်လယ်ပြင်မှာတွေ့ရှိရာကနေ ဖမ်းဆီးခဲ့တာလို့ ဒေသခံတွေက ပြောပါတယ်။
“ရေတပ်သင်္ဘောက ပင်လယ်ထဲတွေ့လို့ ဖမ်းတယ်ကြားတယ်။ ဘယ်သွားဖို့ ထွက်လာတယ်ဆိုတာတော့ မသိရသေးဘူး၊ အားလုံး ၄၈ ယောက် အမျိုးသမီးပိုများတယ်”လို့ ရဲတပ်ဖွဲ့နဲ့နီးစပ်သူတဦးက ပြောပါတယ်။
စစ်ကောင်စီရဲ့ ရေတပ်သင်္ဘော အမှတ် ၅၅၉ ကင်းလှည့်ယာဉ်က ရွှေသောင်ယံကမ်းခြေရဲ့ အနောက်ဘက် ပင်လယ်ပြင်မှာတွေ့တဲ့ ငါးဖမ်းစက်လှေအား မသင်္ကာလို့ စစ်ဆေးရာကနေ ရိုဟင်ဂျာ အမျိုးသား ၂၂ ဦး၊ အမျိုးသမီး ၂၄ ဦးနဲ့ ကလေး ၂ ဦးကို ဖမ်းမိခဲ့တာလို့ ဆိုပါတယ်။
ဖမ်းမိတဲ့ ရိုဟင်ဂျာ ၄၈ ဦးကို ရွှေသောင်ယံရဲစခန်းမှာ ဖမ်းဆီးထားပြီး အရေးယူဖို့အတွက် ဌာနအဆင့်ဆင့်ကို တင်ပြထားတယ်လို့ ရဲတပ်ဖွဲ့အသိုင်းဝိုင်းက သိရပါတယ်။
