တနင်္သာရီတိုင်း၊ လောင်းလုံးမြို့နယ်၊ ပန္ဒလဲကျေးရွာရှိ နေအိမ်တလုံးမှာ စခန်းချနေထိုင်တဲ့ စစ်ကောင်စီလက်အောက်ခံ ပျူစောထီးအဖွဲ့ဝင်တွေကို ဇူလိုင် ၉ ရက်၊ ည ၁၁ နာရီကျော်လောက် ပြည်သူ့ကာကွယ်ရေးတပ်ဖွဲ့တွေ ပူးပေါင်းပြီး သွားရောက်တိုက်ခိုက်ခဲ့တယ်လို့ လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်ထားပါတယ်။

အဲဒီပူးပေါင်းတိုက်ခိုက်မှုမှာ လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့၊ အထူးပြောက်ကျားတပ်ဖွဲ့၊ T5 ဖယ်ဒရယ်စစ်ကြောင်းက တပ်ဖွဲ့ဝင်များ၊ ထားဝယ်ခရိုင် ပြည်သူ့ကာကွယ်ရေးတပ်ဦး တပ်ခွဲ(၁) နဲ့ Dawei Defense Team_ DDT တပ်ခွဲ (၃) တို့ ပါဝင်ပြီး တိုက်ခိုက်မှုကြောင့် ပျူစောထီးအဖွဲ့ဝင်တဦးသေဆုံးကာ ဒဏ်ရာရရှိသူတွေလည်းရှိတယ်လို့ သိရပေမယ့် သီးခြားအတည်ပြုနိုင်ခြင်းတော့ မရှိသေးပါဘူး။

တိုက်ခိုက်မှုအတွင်း အပြန်အလှန်ပစ်ခတ်မှု တနာရီခွဲလောက် ဖြစ်ပွားခဲ့ကာ ပြည်သူ့ကာကွယ်ရေးတပ်ဖွဲ့ဝင်တွေ အောင်မြင်စွာဆုတ်ခွာပြီး မိနစ်နှစ်ဆယ်ခန့်အကြာမှာတော့ အမှတ် (၁၀၄) ခြေလျင်တပ်ရင်းမှ စစ်ကောင်စီတပ်ဖွဲ့ဝင်များ စစ်ကား ၄ စီးနဲ့ စစ်ကူရောက်ရှိလာတယ်လို့လည်း သိရပါတယ်။

လောင်းလုံးဒေသခံတဦးက "အဲညက ပစ်နေကြတာက ပန္ဒလဲမှာတင်မဟုတ်ဘူး၊ သုံးနေရာလောက်က ပစ်သံတွေကြားရတာ။ ပန္ဒလဲမှာက အပြန်အလှန်ပစ်ပြီး တိုက်ပွဲဖြစ်တာ၊ စစ်ကူဆင်းလာတဲ့ ကားလေးစီးက လမ်းမှာ နှစ်စီးကျန်ခဲ့ပြီး ပန္ဒလဲကိုတော့ နှစ်စီးရောက်လာတယ်" လို့ ပြောပါတယ်။

လမ်းတလျှောက် သေနတ်ပစ်ခတ်ပြီး စစ်ကူဆင်းလာတဲ့ စစ်ကား ၄ စီးကို ပြည်သူ့ကာကွယ်ရေးတပ်ဖွဲ့ဝင်တွေက မိုင်းဆွဲတိုက်ခိုက်ခဲ့ပေမယ့် မပေါက်ကွဲခဲ့ဘူးလို့လည်း သိရပါတယ်။

ပန္ဒလဲကျေးရွာဟာ ထားဝယ်မြို့ကနေ ၇ မိုင်ခန့်အကွာ ထားဝယ်-လောင်းလုံး ကားလမ်းမပေါ်မှာတည်ရှိပြီး ပျူစောထီးအဖွဲ့ဝင်တွေရဲ့ ရမ်းကားမှုကြောင့် မေလ အစောပိုင်းကနေ အခုထိ တရွာလုံးနီးပါ နေအိမ်စွန့်ခွာ တိမ်းရှောင်နေကြရပါတယ်။

လောင်းလုံးမြို့နယ်အတွင်း ပြီးခဲ့တဲ့ ဇွန်လအတွင်းက စစ်ကောင်စီတပ်ဖွဲ့ဝင်တွေနဲ့ အဆိုပါ ပျူစောထီးအဖွဲ့ဝင်တွေရဲ့ ပူးပေါင်းဖမ်းဆီးပစ်ခတ်မှုတွေကြောင့် ပြည်သူ ၆ ဦး သေဆုံးခဲ့ပြီး နေအိမ်တလုံးလည်း မီးလောင်ပျက်စီးခဲ့တယ်လို့ ဒေသခံတွေက ပြောပါတယ်။

အခုတိုက်ခိုက်ခံရတဲ့ ပျူစောထီးအဖွဲ့ဝင်တွေဟာ ပြီးခဲ့တဲ့ ဧပြီ ၂၈ ရက်ညကလည်း ပန္ဒလဲကျေးရွာအတွင်း ကျေးရွာရပ်မိရပ်ဖ ၃ ဦးကို နေအိမ်တွေထဲအထိ ဝင်ရောက် ပစ်ခတ်တာကြောင့် ၂ ဦးသေဆုံးခဲ့ပြီး ၁ ဦး အပြင်းအထန် ဒဏ်ရာရရှိခဲ့ပါတယ်။