စစ်ကိုင်းတိုင်း၊ ကလေးမြို့နယ်၊ နတ်မြောင်းကျေးရွာမှာ တပ်စွဲပြီး ထွက်လာတဲ့ စစ်ကောင်စီတပ်ဖွဲ့ကို ဟဲလုပ်ကျေးရွာအနီးမှာ ဇွန် ၂၂ ရက် မနက်ပိုင်းက အသင့်စောင့်ဆိုင်းနေတဲ့ Cdf-KKg နဲ့ ပူးပေါင်းတပ်ဖွဲ့တွေက ချုံခိုတိုက်ခိုက်ခဲ့တယ်လို့ Chinland Defense Force- Kalay-Kabaw- Gangaw အဖွဲ့က ပြောပါတယ်။
တိုက်ပွဲဟာ ပြင်းထန်ခဲ့ပြီး နှစ်ဦးနှစ်ဖက် လက်နက်ကြီး လက်နက်ငယ်တွေနဲ့ အပြန်အလှန် ပစ်ခတ်ခဲ့ကြကာ စစ်ကောင်စီဘက်က ၁၀ ဦးထက်မနည်း ကျဆုံးပြီး အများအပြား ဒဏ်ရာရရှိကြောင်း၊ မိမိတို့ ပူးပေါင်းတပ်ဖွဲ့ဘက်က ပကဖရဲဘော် ၁ ဦး၊ CNDF ရဲဘော် ၂ ဦး၊ ကလေး PDF ၁ ဦး စုစုပေါင်း ၄ ဦး ဒဏ်ရာရရှိခဲ့ကာ ကလေး PDF တပ်ဖွဲ့ဝင် ၁ ဦး ကျဆုံးခဲ့တယ်လို့ CDF-KKG က ပြောပါတယ်။
အဆိုပါတိုက်ပွဲကြောင့် ဟဲလုပ်ရွာနဲ့ ခွေကြိမ်ကျေးရွာက ဒေသခံတွေဟာ ဘေးလွတ်ရာ ဒေသတွေကို ထွက်ပြေးတိမ်းရှောင်နေကြရတာပါ။
ဇွန် ၂၁ ရက်ကလည်း ထိုမာကျေးရွာအနီးမှာ ကလေး PDF တပ်ဖွဲ့ဝင်တွေရဲ့ မိုင်းဆွဲတိုက်ခိုက်ခံရမှုကြောင့် စစ်ကောင်စီတပ်သား အများအပြား ကျဆုံးခဲ့ပါသေးတယ်။
လက်ရှိမှာ စစ်ကောင်စီတပ်တွေနဲ့ ပြည်သူ့ကာကွယ်ရေးတပ်ဖွဲ့တွေကြား စစ်ရေးတင်းမာနေတာကြောင့် မိဘပြည်သူတွေအနေနဲ့ ကလေး-ဂန့်ဂေါလမ်းပိုင်းကို ဖြတ်သန်းသွားလာတာတွေ မပြုကြဖို့လည်း ကလေး PDF က အသိပေး ထုတ်ပြန်ထားပါတယ်။
လက်ရှိမှာ စစ်ကောင်စီတပ်တွေဟာ ကလေးနယ်ကို အင်တာနက်လိုင်းတွေ ဖြတ်တောက်ထားပြီး သတင်းအမှောင်ချထားတာ ၄ လဝန်းကျင် ရှိနေပြီဖြစ်ပြီး ကလေးနယ်ကို အင်အားအလုံးအရင်းနဲ့ ထိုးစစ်ဆင်ကာ ဒေသခံတွေကို ဖမ်းဆီးသတ်ဖြတ်တာ၊ လူနေအိမ်တွေကို မီးရှို့ဖျက်ဆီးတာတွေ ပြုလုပ်နေပါတယ်။
လတ်တလော ကလေးနယ်အတွင်းမှာ စစ်ရေးတင်းမာနေတာကြောင့် ဒေသခံတွေအနေနဲ့ စစ်ကောင်စီတပ်တွေနဲ့ တိုက်ရိုက်ထိတွေ့တာတွေ မပြုကြဖို့နဲ့ ဘေးလွတ်ရာဒေသတွေမှာ ဂရုစိုက်နေထိုင်ကြဖို့ကိုလည်း ကလေးပြည်သူ့ကာကွယ်ရေးတာဝန်ခံတွေက သတိပေးထားပါတယ်။
