မြဝတီအခြေစိုက် မှုခင်းသတင်းထောက် ၁ ဦး ပျောက်ဆုံး
DVB
·
June 3, 2022
ကရင်ပြည်နယ်၊ မြဝတီမြို့အခြေစိုက် မှုခင်းသတင်းထောက် ကိုမျိုးဝင်းဟာ မေ ၂ ရက်ကစပြီး ပျောက်ဆုံးနေတယ်လို့ ဇွန် ၃ ရက်မှာ သူ့ရဲ့ မိသားစုက ပြောပါတယ်။
မှုခင်းသတင်းထောက် ကိုမျိုးဝင်းဟာ မြဝတီမြို့ ရပ်ကွက် ၃ မှာ နေထိုင်သူဖြစ်ပြီး ရပ်ကွက် ၃ ဆယ်အိမ်မှူး ကိုကျော်ခိုင်နဲ့အတူ BGF တပ်နယ် ၄ တပ်ဖွဲ့ဝင်ဟောင်း ဗိုလ်ကြီးစောခြင်းလုံအဖွဲ့က နေအိမ်ကနေ ခေါ်ဆောင်သွားတာလို့ မိသားစုဝင်တယောက်က ပြောပါတယ်။
ဇွန် ၂ ရက်မှာတော့ ကိုမျိုးဝင်းကို ချုပ်နှောင်ရာနေရာကို မိသားစုက ရဲစခန်းမှာ သွားရောက်မေးမြန်းရာ ရဲစခန်းက ရပ်ကွက် ၃ တာဝန်ရှိသူကို ဆက်လက်မေးမြန်းပြီး ကိုမျိုးဝင်း သေဆုံးသွားပြီဖြစ်ကြောင်း သိခဲ့ရတယ်လို့ မိသားစုဝင်က ပြောပါတယ်။
မြန်မာ-ထိုင်းနယ်စပ် မြဝတီမြို့ အခြေစိုက် သတင်းထောက် ကိုမျိုးနောင်နောင်ဇော် (ခ) နေနော်ကိုလည်း ပြီးခဲ့တဲ့ မတ်လ ၂၈ ရက်မှာ စစ်ကောင်စီက ဖမ်းဆီးထားပါတယ်။
