မန္တလေးမြို့၊ မဟာအောင်မြေမြို့နယ်၊ စိန်ပန်းရပ် ၊ ၃၈လမ်း၊ လမ်း ၉၀ နဲ့ ၉၁ ကြားမှာ မေ ၂၈ ရက် ညနေ ၅ နာရီကျော်လောက်က အမျိုးသား ၂ ဦး သေနတ်နဲ့ ပစ်သတ်ခံခဲ့ရပါတယ်။

သေနတ်နဲ့ ပစ်သတ်ခံရတဲ့သူတွေဟာ ရာအိမ်မှူး ဦးရန်နိုင်ကျော် နဲ့ အတူပါလာတဲ့ ဦးအောင်ကျော်မိုး တို့ဖြစ်ပြီး သေနတ်ဒဏ်ရာတွေနဲ့ ၂ ဦးလုံး သေဆုံးသွားတယ်လို့ သိရပါတယ်။

ရာအိမ်မှူး ဦးရန်နိုင်ကျော် (ခ) ထော့ကျိုးကို စစ်ကောင်စီ သတင်းပေးဆိုကာ Generation Z Power - GZP (Mandalay) ပြည်သူ့ကာကွယ်ရေးမြို့ပြပြောက်ကျားတပ်ဖွဲ့ GENERATION POW က ပစ်သတ်ခဲ့တာလို့ ထုတ်ပြန်ထားပါတယ်။

ရာအိမ်မှူး ဦးရန်နိုင်ကျော် နဲ့ အတူပါလာတဲ့ ဦးအောင်ကျော်မိုးဟာ ဝင်ရောက် ကာကွယ်မှုကြောင့် ထိမှန်သွားခဲ့တာလို့ ထုတ်ပြန်ချက်မှာ ဖော်ပြထားပါတယ်။

ဦးရန်နိုင်ကျော်နဲ့ ဦးအောင်ကျော်မိုး တို့ ပစ်သတ်ခံရအပြီးမှာ လက်နက်ကိုင် ရဲတပ်ဖွဲ့ဝင်တွေနဲ့ စစ်ကောင်စီတပ်သားတွေ ရောက်ရှိလာပြီး အနီးပတ်ဝန်းကျင်မှာ ပိတ်ဆို့စစ်ဆေးတာတွေ လုပ်သွားတယ်လို့ သိရပါတယ်။