တနင်္သာရီတိုင်း၊ လောင်းလုံးမြို့ မြို့အဝင်ဆိုင်းဘုတ်အနီး လမ်းသွားလမ်းလာတွေကို စစ်ဆေးဖို့ ရောက်ရှိနေတဲ့ စစ်ကောင်စီလက်အောက်ခံ ရဲတပ်ဖွဲ့ဝင်တွေနဲ့ စရဖတပ်ဖွဲ့ဝင် ၁၂ ဦးလောက်ဟာ ဒီကနေ့ မေ ၂၇ ရက် မနက် ၆ နာရီလောက် ပစ်ခတ်တိုက်ခိုက်ခံရပြီတယ်လို့ လောင်းလုံးမြို့ခံတွေက ပြောပါတယ်။
လောင်းလုံးမြို့ခံတဦးက “ပစ်ခံရတာက အနီးကပ်ပဲ၊ ထိခိုက်မှုတော့ ရှိနိုင်တယ်။ ရဲကားတော့ ဘီးပေါက်ပြီး မြို့ထဲပြန်ဝင်လာတယ်၊ ကားမောင်းလာတာတော့ အေးအေးဆေးဆေးပဲ" လို့ ပြောပါတယ်။
လောင်းလုံးအခြေစိုက် ပြည်သူ့ပန်းတိုင် ပြောက်ကျားတပ်ဖွဲ့က အဲဒီပစ်ခတ်တိုက်ခိုက်မှုကို သူတို့လုပ်ဆောင်ခဲ့တာဖြစ်ပြီး အပြန်အလှန်ပစ်ခတ်မှု ၁၀ မိနစ်လောက် ဖြစ်ပွားကာ စစ်ကောင်စီတပ်ဘက်က ၂ ဦးထက်မနည်း သေဆုံးခဲ့တယ်လို့ ထုတ်ပြန်ထားပေမဲ့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။
ပစ်ခတ်ခံရပြီးနောက် စစ်ကောင်စီတပ်ဘက်က လောင်းလုံးမြို့ အထွေထွေအုပ်ချုပ်ရေးမှူးရုံးအနီး လမ်းသွားလမ်းလာတွေကို စစ်ဆေးတာတွေ ပြုလုပ်နေပြီး ဖမ်းဆီးတာမျိုးတော့ မရှိဘူးလို့ သိရပါတယ်။
အခုပစ်ခတ်တိုက်ခိုက်ခံရတဲ့ မြို့အဝင်ဆိုင်းဘုတ်အနီး စစ်ကောင်စီတပ်ဖွဲ့ဝင်၊ ရဲတပ်ဖွဲ့ဝင်၊ စရဖတပ်ဖွဲ့ဝင်နဲ့ ပျူစောထီးအဖွဲ့ဝင်တွေ ပေါင်းပြီး လမ်းသွားလမ်းလာတွေကို မကြာခဏဆိုသလို စစ်ဆေးလေ့ရှိပြီး မှတ်ပုံတင်၊ ကိုဗစ်-၁၉ ဆေးထိုးလက်မှတ်၊ ဆိုင်ကယ်လိုင်စင်တွေ မပါပါက ငွေညှစ်ခံရတာတွေ ကြုံရလေ့ရှိတယ်လို့ လောင်းလုံးဒေသခံတွေက ပြောပါတယ်။
မေ ၁၇ ရက်၊ နေ့လယ် ၁ နာရီခွဲလောက်ကလည်း စွန်ရဲအမည်ခံ ပျူစောထီးအဖွဲ့ဝင်တွေ စီးနင်းလာတဲ့ ကားတစီး လောင်းလုံးမြို့အနီး ထားဝယ်-လောင်းလုံး ကားလမ်းမပေါ်မှာ ပစ်ခတ်တိုက်ခိုက်ခံခဲ့ရပြီး ၁ ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။
