ရန်ကုန်တိုင်း၊ အင်းစိန်မြို့နယ်၊ အောင်ဆန်းရပ်ကွက်နေ Taxi ယာဉ်မောင်း ကိုမျိုးကို စစ်ကောင်စီရဲ့တပ်ဖွဲ့ ၂၀ ကျော်က မေ ၂၄ ရက်နေ့ နေ့လယ် ၂ နာရီခွဲလောက် လာရောက်ဖမ်းပေမယ့် ဖမ်းမမိတာကြောင့် ဇနီး မဇင်မိုးဖြူနဲ့ ၁၀ နှစ်သားအရွယ် သားဖြစ်သူ မောင်ထက်ဘုန်းဇာနည် တို့ကို ဖမ်းသွားတယ်လို့ မိသားစုနဲ့နီးစပ်တဲ့သူတွေက ပြောပါတယ်။
မိသားစုနှင့် နီးစပ်သူတယောက်က “အရပ်ဝတ်တွေနဲ့ရော ယူနီဖောင်းဝတ်တွေနဲ့ရော အယောက် ၂၀ လောက်ရှိမယ်၊ ကိုမျိုးကို အိမ်ကို ဝိုင်းပြီးလာဖမ်းတာ။ ကိုမျိုးကိုကို မတွေ့တော့ ကိုမျိုးကို သားလေးကို ကားပေါ်ဆွဲတင်ပြီးဖမ်းတာ။ အဲဒီမှာ ကိုမျိုးကို မိန်းမက သူ့သားကို ဖမ်းမယ်ဆိုရင် သူပါလိုက်မယ်ဆိုပြီး လိုက်သွားတော့ သားအမိ နှစ်ယောက်စလုံးကို ဖမ်းသွားတာ” လို့ ပြောပါတယ်။
ဖမ်းဆီးခံရတဲ့ ၁၀ နှစ်သားအရွယ် ကလေးငယ် မောင်ထက်ဘုန်းဇာနည်မှာ အတက်ရောဂါရှိပြီး ဆေးခန်း မကြာခဏပြနေရတာကြောင့် ကလေးငယ်ရဲ့ ကျန်းမာရေးကို မိသားစုဝင်တွေက စိုးရိမ်နေတယ်လို့ ဆိုပါတယ်။
အာဏာသိမ်းစစ်ကောင်စီတပ်ဖွဲ့တွေက ကိုမျိုးကိုအား ဘာကြောင့် လာရောက်ဖမ်းဆီးတာလဲဆိုတာ မသိရသေးသလို ဓားစာခံအနေနဲ့ဖမ်းထားတဲ့ သားဖြစ်သူနဲ့ ဇနီးကိုလည်း ဘယ်မှာဖမ်းဆီးထားသလဲဆိုတာကို မသိရသေးဘူးလို့ မိသားစုနဲ့ နီးစပ်သူက ပြောပါတယ်။
