တောင်သူလယ်သမားအရေး တက်ကြွလှုပ်ရှားသူ ဦးအေးသိန်းကို ထောင်ဒဏ် ၃ နှစ် အမိန့်ချ
DVB
·
May 19, 2022
မန္တလေး အိုးဘိုအကျဉ်းထောင်မှာ ဖမ်းဆီးခံထားရတဲ့ တောင်သူလယ်သမား အရေးတက်ကြွလှုပ်ရှားသူ ဦးအေးသိန်းကို ပုဒ်မ ၅၀၅ (က) နဲ့ ထောင်ဒဏ် ၃ နှစ် ကျခံဖို့ မေလ ၁၇ ရက်မှာ ထောင်တွင်းတရားရုံးမှာ အမိန့်ချခဲ့တယ်လို့ သူ့ရဲ့ရှေ့နေထံကသိရပါတယ်။
ဦးအေးသိန်းဟာ မန္တလေးမြို့ ချမ်းမြသာစည်မြို့နယ်အတွင်း နေအိမ်တအိမ်မှာ ရှိနေစဉ် ၂၀၂၁ ခုနှစ် စက်တင်ဘာ ၂၀ ရက်နေ့က ဖမ်းဆီးခံခဲ့ရတာဖြစ်ပြီး စစ်ကောင်စီက သူ့ကို ရာဇသတ်ကြီး ပုဒ်မ ၅၀၅ (က) နဲ့ တရားစွဲဆိုခဲ့တာပါ။
“အမိန့်က အပြည့်ချလိုက်တာ ၃ နှစ်။ သူ့အနေနဲ့ ဆန္ဒပြရာမှာ ပါတယ်ဆိုပြီး အမိန့်ချတာ။ ဒီကိစ္စနဲ့ ပတ်သက်လို့ မငြင်းဘူး။” လို့ ဦးအေးသိန်းရဲ့ ရှေ့နေ တယောက်က ပြောပါတယ်။
ဒါ့အပြင် ဦးအေးသိန်းကို အကြမ်းဖက်မှုတိုက်ဖျက်ရေးဥပဒေ ပုဒ်မ ၅၀(ည)/၅၁(ဂ) တို့နဲ့လည်း မန္တလေးခရိုင်တရားရုံးမှာ တရားစွဲဆိုထားပါသေးတယ်။
