ရှမ်းပြည်နယ်မြောက်ပိုင်း၊ လားရှိုးမြို့၊ အမှတ်(၁)ရပ်ကွက်၊ ဗျူဟာလမ်းမှာရှိ အဝတ်အထည်နဲ့ ဖန်စီပစ္စည်းအရောင်းဆိုင် ၃ ဆိုင်  မေလ ၁၆  ရက်က ဖောက်ထွင်းခံရပြီး ပစ္စည်းတွေ ခိုးယူခံခဲ့ရတယ်လို့ ဒေသခံတွေထံက သိရပါတယ်။

ဖောက်ထွင်းခံရတဲ့ ဆိုင်တွေကတော့ Vantage- flannel collection အထည်ဆိုင်၊ Nang Lao Kham အထည်ဆိုင်နဲ့ Fancy ဆိုင်တို့ဖြစ်ပါတယ်။ 

“ကျနော်တို့ ဆိုင်ပြတင်းပေါက်ကို ဓားနဲ့ ကလန့်ဖွ့င်ပြီး အထည်တွေအပြင် ဂစ်တာနဲ့ ဆိုင်တာဝန်ခံ ညီမလေးရဲ့ မှတ်ပုံတင်၊ ငွေသားတွေ ယူသွားတယ်” လို့ Vantage- flannel collection ဆိုင်က ပြောပါတယ်။

ဒီဖောက်ထွင်းမှုနဲ့ ပတ်သက်ပြီး သက်ဆိုင်ရာရဲစခန်းမှာ အမှုဖွင့်ထားပေမယ့် ပြစ်မှုကျူးလွန်သူကို လက်ရှိအချိန်ထိ ဖမ်းဆီးရမိတာ မရှိသေးပါဘူး။

စစ်အာဏာသိမ်းပြီးနောက်ပိုင်း ဒုတိယပြည်နယ်ရဲတပ်ဖွဲ့မှူး ရုံးစိုက်ရာ ရှမ်းပြည်နယ်မြောက်ပိုင်းရဲ့ မြို့တော် လားရှိုးမြို့မှာ မူးယစ်ဆေးဝါး၊ လောင်းကစားဝိုင်း၊ ဂိမ်းရုံ၊ ကေတီဗီ၊ နိုက်ကလပ်တွေ၊ ပေါများလာသလို လုယက်မှု၊ ဖောက်ထွင်းမှု၊ ခိုးမှုတွေနဲ့ ဒုစရိုက်မှုတွေ ပိုမိုများပြားလာနေတယ်လို့ မြို့ခံတွေက ပြောပါတယ်။