ယင်းမာပင်ခရိုင် ပုလဲမြို့နယ် ချောင်းဦးရွာ အခြေခံပညာအလယ်တန်းကျောင်းကို မေ ၁၄ ရက်နေ့ မနက် ၁၀ နာရီလောက်မှာ စစ်ကောင်စီတပ်က မီးရှို့ခဲ့တယ်လို့ ဒေသခံတွေက ပြောပါတယ်။
“သူတို့က ရွာထဲကိုဝင်လာပြီး အခုလို စာသင်ကျောင်းကို မီးရှို့တာတွေ လုပ်သွားတယ်ဗျ၊ ဘာကြောင့် လုပ်တယ်တော့ မမေးပါနဲ့ဗျာ။ ဒီကောင်တွေက အထက်အရာရှိတွေကို PDF က လုပ်တယ်လို့ စာရင်းလေးတချက်တင်လိုက်ရင် ပြီးနေတဲ့ကိစ္စဆိုတော့ အခုလိုမြေပြင်မှာ မီးရှို့တာဖြစ်နိုင်တယ်” လို့ ဒေသခံပြည်သူတဦးက ပြောပါတယ်။
စစ်ကောင်စီက မီးရှို့လို့ ကျောင်းဆောင် ၃ ဆောင်အပါအဝင် ရုံးသုံးစာရွက်စာတမ်းအားလုံး မီးလောင်ပျက်စီးသွားခဲ့ရတယ်လို့ ဒေသခံရွာသားက ထပ်မံပြောဆိုပါတယ်။
အဆိုပါ ချောင်းဦးရွာဟာ ပထမတကြိမ် စစ်ကောင်စီတပ်သားတွေက မီးရှို့ဖျက်ဆီးတာတွေ ပြုလုပ်ခဲ့ကြသလို အခု ဒုတိယအကြိမ် မီးရှို့ဖျက်ဆီးခံခဲ့ရတာလို့ ဒေသခံရွာသားတွေက ပြောပါတယ်။
စစ်ကောင်စီကတော့ ကျေးရွာနေအိမ်တွေကို မီးရှို့ဖျက်ဆီးတာ သူတို့တပ်ဖွဲ့ဝင်တွေ လုပ်တာမဟုတ်ဘူးလို့ အမြဲငြင်းဆိုလေ့ရှိပါတယ်။
