မကွေးတိုင်း၊ ထီးလင်းမြို့နယ် ဆေးမင်းတောရဲစခန်းကနေ စခန်းစွန့်ခွာလာတဲ့ ရဲတွေနဲ့ စစ်ကောင်စီတပ်သားတွေ မေ ၇ ရက်နေ့မွန်းလွဲပိုင်းမှာ မိုင်းဆွဲတိုက်ခိုက်ခံရတာကြောင့် ၁၀ ယောက်လောက်သေဆုံးပြီး အများအပြားဒဏ်ရာရရှိခဲ့တယ်လို့ YDF-ထီးလင်းက ပြောပါတယ်။
ထီးလင်းမြို့နယ် ဆေးမင်းတောရဲစခန်းကနေ စခန်းစွန့်ခွာလာတဲ့ ရဲအင်အား ၄၀ အပါအဝင် တပ်မ ၁၁ က စစ်ကောင်စီတပ်အင်အား ၁၂၀ လောက်ပါတဲ့ စစ်ကြောင်းကို YDF-ထီးလင်းက ဇီးတောကျေးရွာနားမှာ မွန်းလွဲ ၁ နာရီ ၄၅ မိနစ်လောက်က မိုင်းဆွဲတိုက်ခိုက်ခဲ့တာလို့ YDF-ထီးလင်းရဲ့ ခေါင်းဆောင် သခင်ဇော်က ဒီဗွီဘီကို ပြောပါတယ်။
“သူတို့လာတဲ့ လမ်းကြောင်းကို ဇီးတောကျေးရွာမရောက်ခင်မှာ ကျနော်တို့ဘက်က မိုင်းဘီလူးအကြီးဆွဲပြီး တိုက်ခိုက်တာဗျ။ မိုင်းက တလုံးကို ယမ်းပိဿာချိန် ၃၀ လောက်ပါတဲ့ မိုင်း ၂ လုံးပေါက်ကွဲခဲ့တယ်။ အဲဒီနောက်မှာ ဒရုန်းနဲ့ ပတ်ကြည်တော့ စစ်ကောင်စီဘက်က ၁၀ ယောက်လောက်မြေပြင်မှာလဲနေတာ တွေ့ရတယ်။ ကျနော်တို့ ခန့်မှန်းတာကတော့ စစ်ကောင်စီဘက်က ၁၀ ယောက်လောက်သေဆုံးနိုင်ပြီး အများအပြားဒဏ်ရာရမယ် ခန့်မှန်းထားတယ်။”
ဆေးမင်းတောရဲစခန်းက ရဲတွေတွေဟာ လုံခြုံရေးအရ အဲဒီစစ်ကြောင်းနဲ့ လိုက်သွားတာဖြစ်နိုင်သလို သွားကြိုတာလည်း ဖြစ်နိုင်တယ်လို့ ဆိုပါတယ်။
ရဲနဲ့ စစ်ကောင်စီတပ်တွေဟာ ဆေးမင်းတောရဲစခန်းကို မစွန့်ခွာမီ မေ ၇ ရက်နေ့ မနက်ပိုင်းက နင်းမိုင်းတွေ၊ တိုက်မိုင်းတွေ ထောင်ထားတာကြောင့် YDF-ထီလင်းက သွားရောက်ရှင်းလင်းခဲ့ရတယ်လို့ သိရပါတယ်။
နှစ်ဖက်တိုက်ပွဲတွေနဲ့ ပတ်သက်ပြီး ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာ မတွေ့ရသေးပါဘူး။
