မန္တလေးတိုင်း၊ ဝမ်းတွင်းမြို့နယ်၊ ကျေးရွာတချို့မှာ ဧပြီ ၂၉ ရက်မနက် ၁ နာရီလောက်က မိုးသက်လေပြင်း တိုက်ခတ်တာကြောင့် ဘုရားစေတီ ၄ ဆူ ထီးတော်ကျိုးပျက်ပြီး နေအိမ် အဆောက်အဦ ၅၀ ကျော် အမိုးလန်ပျက်စီးသွားတယ်လို့ ဒေသခံတွေထံက သိရပါတယ်။
ဒေသခံ တဦးက "မိုးနဲ့ အတူ လေတွေပါတိုက်လာတာ ဘုရားစေတီတွေကတော့ ထီးတော်တွေပျက်ကုန်တယ်။ စာသင်ကျောင်းဆာင် ၃ ခုနဲ့ ဘုန်းတော်ကြီးကျောင်းအဆောက်အဦ ၃ ခု အမိုးလန်ပျက်စီးတယ်။ အိမ်တွေကတော့ ပျက်တာများတယ်။ တချို့အိမ်တွေဆို လုံးဝပြိုသွားတယ်"လို့ ပြောပါတယ်။
မိုးသက်လေပြင်းတိုက်တာကြောင့် မြောက်ဆည်ရွာ၊ ပဒင်းရွာ၊ ခါတက်ကုန်းရွာနဲ့ အောင်သာရွာတွေမှာ ရွာ ၄ ရွာက လူနေအိမ် ၄၉ လုံးနဲ့ မူလတန်းကျောင်း စာသင်ဆောင်တွေ အမိုးလန်သွားခဲ့ပါတယ်။
ဒါ့အပြင် သာသနိက အဆောက်အဦ ၃ လုံးပျက်စီးပြီး ဘုရားစေတီထီးတော် မြေခတာရှိသလို ယိုင်နဲ့သွားတာလည်းရှိပါတယယ်။
အဆောက်အဦပေါင်း ၅၅ လုံး အမိုးလန်ပျက်စီးခဲ့ပြီး လူနေအိမ်ပျက်စီးလို့ ပြန်လည်နေထိုင်ဖို့ ခက်ခဲတဲ့ မိသားစုတွေကို နီးစပ်ရာ ဆွေမျိုးတွေထံမှာ သက်ဆိုင်ရာကူညီကယ်ဆယ်ရေးအဖွဲ့တွေက နေရာချထားပေးတယ်လို့ သိရပါတယ်။
မိုးသက်လေပြင်း တိုက်ခတ်လို့ သစ်ပင်တွေ၊ အဆောက်အဦတွေ ပျက်စီးသွားပေမဲ့ လူနဲ့ တိရစ္ဆာန် ထိခိုက်မှုတော့ မရှိဘူးလို့ သိရပါတယ်။
